Botica di Servicio ta Organisa Launch Event dia 1 di September pa e di Seis Edicion di Diabetes Run & Walk 2023

ORANJESTAD - Botica di Servicio ta organisa su Launch Event dia 1 di September 2023 di 5pm pa 8pm na Botica Eagle unda participantenan por registra dibiaha pa e careda. Cu esaki, tur participante cu ta registra y participa riba e dia di e careda ta participa pa gana un weekend stay na Hilton Aruba. 

Alabes, Botica di Servicio ta anuncia cu diadomingo, 12 di november 2023, nan lo tin nan di seis edicion di Diabetes Run & Walk lo tuma lugar.

Cu e evento aki, e organisacion por recauda fondo pa iniciativonan cu ta promove e prevencion di diabetes y tambe siña personanan cu diabetes con pa maneha e malesa aki di miho forma. No solamente esaki, pero tambe pa curasha y tambe conscientisa e pueblo di Aruba tocante diabetes tipo 1 y tipo 2 en cuanto con esaki ta wordo maneha y preveni.

E enfoke e aña aki lo bai riba e prevencion di diabetes entre muchanan, den colaboracion cu Jump18. Aruba Aloe y Botica di Servicio ta uni man pa trece e fondonan di e Diabetes Run & Walk 2023 na Jump18 pa asina por pone enfasis tanto riba e prevencion di diabetes como tambe riba obesidad entre muchanan. 

Jump18 ta un organisacion di hobennan profesional di salubridad na Aruba y un pediatra cu ta desaroya un iniciativo practico pa capacita e muchanan y nan mayornan pa mehora nan salud y bienestar. Jump18 su obhetivo ta pa yuda tanto muchanan como nan mayornan pa biba un bida mas saludabel, (re)educando y desafiando nan creencianan limitante.

Diabetes ta sigui ta un problema serio riba e isla di Aruba, di cual e porcentahe di personan cu diabetes ta casi dobel e porcentahe di e populacion mundial cu tin diabetes. E mita di pashent cu diabetes no ta ni na altura cu nan tin e malesa y no ta ricibi e atencion medico cu nan mester. Durante varios aña, Botica di Servicio, Fundacion Diabetes Aruba, hunto cu hopi otro organisacionan, a uni man den trece conscientisacion di diabetes riba e isla di Aruba. 

Aña pasa, 13 di november, Aruba Aloe y Botica di Servicio a organisa e di cinco aña di nan “Diabetes Run & Walk”, unda a participa 1.250 personanan, yegando na 15.000 florin di fondonan recauda. Cu e fondonan di e evento, FDA por a sigui cu su programa di PRISMA. Cu esaki, e fundacion ta logra provee patientnan cu training den con pa maneha diabetes. FDA a lanza e programa di PRISMA den 2019 pa patientnan cu diabetes tipo 2. E programa aki ta enfoca riba empoderamento y maneho propio di diabetes.

E aña aki, Diabetes Run & Walk 2023 tin e meta di ricibi 1.500 personanan pa participa den e di seis edicion y asina contribui na e causa di diabetes riba e isla di Aruba y asina contribui na e prevencion di diabetes entre nos hobenan. 

Check out e Facebook page na “Diabetes Run & Walk” https://www.facebook.com/diabetesrunaruba pa mas informacion y updates y https://diabetesrunaruba.com/ pa e resultadonan di Diabetes Run & Walk 2022.