Oduber: CFT no a pidi pa adaptacion den presupuesto 2015!

ORANJESTAD – College Financieel Toezicht (CFT) no a pidi pa adaptacionnan tuma lugar den presupuesto. Asina minister Otmar Oduber a bisa NoticiaCla.com. Asina e mandatario ta interpreta e acuerdonan recien firma (specificamente e articulo tres di e protocol di 2 di mei), y e cartanan di conseho cu CFT a manda pa gobierno di Aruba. “CFT ta bisabo cu durante aña, bo mester percura pa haci adaptacionnan si bo ta ripara cu bo no ta yega na e normanan cu bo mes a pone pa bo mes e aña aki”. E mandatario ta sigui bisa cu “te asina lew cu mi sa no tin ningun nota di cambio cu lo wordo presenta. E presupuesto manera cu e la wordo presenta, ta conforme cu loke a wordo planifica”.

CFT NO POR IMPONE

Segun Oduber, na Aruba College Financieel Toezicht no por impone nada actualmente. “Na Aruba nan no tin ningun rechtsvorming pa bisa cu nan tin un derecho”. Esaki ta pensamento di minister Otmar Oduber, riba e situacion di CFT y e protocol cu a keda firma mas cu un siman pasa. Mes momento Oduber ta conciente si, cu CFT su puntonan ta mas bien pa “sigura cu Aruba ta cumpliendo cu loke e mes a bisa” .Mes momento Oduber ta sigura cu lo respeta cierto consehonan cu gobierno haya.

CONTROL

Ademas Oduber ta mustra cu, CFT a pone con pa ehecuta na un forma mas sigur, loke cu Aruba mes a scohe pe. E loke cu CFT kier logra, p.e pa Aruba implementa e.o. un solidariteits belasting, aumento di BBO, pero esakinan ta keda meramente consehonan pa logra e ruta principal cu a wordo scohi pa logra e -3.7% di deficit pa 2015. “CFT no por dicidi pa maneho di gobierno di Aruba”. “Huridicamente, CFT no tin ningun base pa bisa cu algo ta wordo haci, manera cu ta na Corsou”. Ta gobernador, segun Oduber, aña pasa a uza e conseho di CFT pa argumenta pakico e no a firma e presupuesto di 2014. “Te awe mi ta diferencia di opinion riba e proceso cu gobernador a tuma na Aruba” Oduber a bisa, di e episodio di aña pasa. E ta considera esaki awor un ‘gepaseerd station’. (lesa articulo # 3 aki).E foto ta uno di archivo durante un conferencia di prensa di CFT na Corsou na december 2014.