Minister riba su posibel retiro relaciona cu protocol firma

ORANJESTAD – “Den partido AVP duidelijk tabatin un diferencia di opinion”. Minister Otmar Oduber papiando cu NoticiaCla.com pa prome biaha di su posibel retiro como minister durante e fin di siman di tension fin di luna pasa. E la confirma, cu prome cu a firma e protocol di 2 di mei ultimo entre Hulanda y Aruba, cos no tabata mucho ‘bon’. Mes momento tambe Oduber ta admiti cu   dado momento e la manda un carta pa prome minister Mike Eman siman pasa cu su ‘preocupacion y punto di bista’. Cu e la bisa cu e la menasa cu tuma su retiro, e mandatario no kier a bisa specificamente. “E posicion tabata firme, e posicion tabata fuerte” Oduber a confirma.

MENASA

Segun Oduber, mientras cu e no kier bisa si e la ‘menasa’ cu retiro, e la confirma si cu e mensahe tabata duidelijk, cu si a firma e protocol manera cu Hulanda tabata kier, e lo a baha e momento ey como minister. Esaki pasobra durante di un reunion di conseho di minister e diabierna anochi ey (1 mei :red) cu a tuma lugar den Bestuurskantoor, a dicidi algo cu Oduber no por a biba cune. Ta e ora Oduber a notifica Eman di su posicion riba e asunto aki pa medio di un carta. Entre e puntonan condiciona, e protocol mester ta hopi cla pa Aruba cu Aruba ta cana su caminda di e meerjaren begroting, y e di dos ta cu ora cu yega na e meta final, Aruba ta haya su begrotingskamer.

COMBERSACION HENTER MAINTA

A base di esey, diasabra henter dia tabatin conversacionnan pa logra esaki. “Hulanda no tabata kier esey na ningun momento. Hulanda tabata kier a lague cu un open ended CFT” , Oduber a sigui. Ora cu a puntra e mandatario si esey no tabata e texto cu si e lo a tuma su retiro, e mandatario a contesta “Claro”. E ta bisa si, cu e momento ey, no tabata papia di retiro ainda. “Den e carta, tabata poni pa reconsidera e decision cu a tuma den conseho di minister, y e momento ey a conduci entre un bay bin cu Hulanda.

DIFERENCIA CU MEP

E ta admiti tambe cu den partido AVP duidelijk tabatin un diferencia di opinion cu partido, pero cu esey por ta. “Ma compara esaki cu MEP, unda cu esaki no tabata posibel y a conduci cu pa motibo di diferencia di opinion di partido, Mervin y Marisol a wordo saca for di partido”. Pa aworaki, e cambionan a tuma lugar, y segun Oduber, ta e resultado final ta conta.

ARTICULO 10

E hecho cu tin discusion riba e resultado, e mandatario ta compronde tambe. Specialmente e articulo 10 di e protocol, (lesa e parti aki) cu si trece cambio na e landsverordening, cu Hulanda ta impone etc. Segun Oduber, e protocol ta bisa esey corectamente. “Si nos no acepta e landsverordening cu nos ta pone den e ley y pase akinan, nos por sali. Pero nos mester wanta nos mes na e consecuencianan tambe di esaki dentro di Reino” Oduber ta bisa, refiriendo na e hecho cu Hulanda por ‘grijp in’.