Atencion pa raportahe negativo di Univision riba Aruba

ORANJESTAD – E serie di raportahe di e canal internacional “Univision” riba Aruba, -specificamente e efecto di venezolanonan pa nos isla-, ta precupa e minister encarga cu turismo, Otmar Oduber. For di fin di aña pasa e canal a traha un serie di entre 3 pa 4 raportahe cu ta ilustra varios punto di precupacion. Entre nan, cu venezolanonan ta invadi Aruba pa cumpra mercancia di prome necesidad, y e ultimo cu ta mustra cu Aruba ta un lugar facil pa drenta y traha. E raportahe di casi 3 minuut, ta titula ?”Venezolanonan, buscando oportunidad na Aruba” y a pasa na Univision algun tempo atras. “Ora bo mira un raportahe asina, e ta yenabo cu un temor pa esnan cu tey caba” Oduber a bisa. E ta referi na e venezolanonan cu a bin Aruba illegal basta aña pasa y ta bibando awo na Aruba .

KICO POR HACI

Oduber a confirma cu e la duna un entrevista na e respectivo canal. “Ma splike (e dama cu a haci e entrevista) cu loke e ta bisa, no ta corecto. Tur caminda tin hende ta drenta illegal. Tin ta bira legal despues di un proceso”. E la sigura cu a splica e canal tambe cu Aruba tin un sistema cu por conta ariba di control pa evita cierto actonan asina. Esey no ta kita afo cu cosnan asina lo sigui pasa. Mas no por a haci contra e raportahenan aki, segun e mandatario, Mira e raportahe aki.