Na Corsou, segun partido PNP Conseho di Minister no a aproba pa entrega presupuesto 2023 laat

WILLEMSTAD – Proposishon pa entregá presupuesto mas lat no a subi agènda Konseho Minister mes. Esaki ta loke ku ku Partido Nashonal di Pueblo (PNP) a duna di konosé den un komunikado emití pa prensa.

Partido Nashonal di Pueblo, komo partner den koalishon a tuma nota di ekspreshonnan di Minister di Finansa den kua e ta bisa ku Konseho di Minister a aprobá su proposishon pa entregá presupuesto 2023 mas lat e aña aki, no mas tardá 6 di novèmber 2023. Esaki a keda publiká den e korant Antilliaans Dagblad di 21 ougùstùs 2023.

Ta di lamentá, pero esaki no ta kuadra ku bèrdat. Di forma stret sra. Ruthmilda Larmonie-Cecilia, Lider Polítiko di PNP ta indiká ku Konseho di Minister no ta ni sikiera na altura di e karta ku e minister a manda pa Parlamento. Es mas, e dokumentu ni sikiera a subi agènda di Konseho di Minister, pues loke e mandatario a trese dilanti ta basá riba un mentira.

Lider polítiko di PNP ta bisa ku un prueba kontundente di loke e ta trese dilanti ta e karta di e mandatario ku a bai pa Parlamento. Tur hende por tuma bon nota ku e karta enkuestion ta fechá un dia despues ku Parlamento a risibié.

Simplemente loke e minister di finansa a trese dilanti no ta kuadra ku bèrdat. Konseho di Minister no a trata e proposishon pasobra e no a subi agènda di Konseho di Minister niun momento te pa ministernan di PNP duna aprobashon na esaki. Pa kolmo riba e fecha indiká ta dos minister di Nashonal a partisipá den e reunion ya ku e di tres tabata biahando pa trabou.

E minister di finansa a manda pidi konseho pa su intenshon di entregá presupuesto mas lat, ku loke lei ta preskribí. Mirando ku ta trata di un mandatario ku semper ta papia i ta boga pa transparensia total PNP ta urgi e mandatario pa laga komunidat mira e konsehonan ku el a haña riba su petishon. PNP a keda straño kon bin e konsehonan ei no ta públiko ainda.

Partido Nashonal di Pueblo ta trahando serio, den kuadro di lei i reglanan di e pais aki pa adelanto di nos nashon.

Kòrsou komo pais hóben ku a kuminsá na 2010, ta krusando momentunan interesante den su historia. Ta sumamente importante pa kada paso di gobièrnu sòru pa fomentá konfiansa den komunidat, pa hinter sosiedat komprondé ku ta huntu mester traha duru pa lanta Kòrsou bèk i pone e pais aki riba pia atrobe.NOTA: E texto ta scirbi den Papiamento fonetico di Corsou.