Gobierno: No tin rason pa conclui cu lo no cumpli cu protocol

ORANJESTAD – “No tin rason pa conclui cu gobierno (di Aruba) lo no cumpli cu e protocol firma entre Aruba y Hulanda dia 2 di mei, incluyendo e punto # 3”. Esaki ta e base di e carta di gobierno como contesta awe nochi na parlamento, riba e pregunta si gobierno ta bay cumpli cu medidanan di CFT den presupuesto 2015. Hopi diferente e carta no tabata cu esun prome di mainta, unda cu a splica den menos detayes, cu gobierno no ta wak motibo pa inclui mas medida den e presupuesto actual.

REACCION PARLAMENTO

Parlamento di nan banda, ta den proceso di evalua e carta y lo bin bek cu un reaccion mas despues, segun presidente di parlamento Marisol Lopez a bisa NoticiaCla.com awe nochi. Nan lo discuti esaki y ta prepara ora cu nan confronta ministernan Bermudez y Eman ora cu nan presenta den parlamento, Lopez a bisa finalmente.

DIFERENCIA

Pa loke ta e carta, e diferencia den e ultimo carta awe nochi ta, cu e ta mas extenso (3 pagina compara cu 1 mainta), y ta duna mas splicacion, incluyendo un citado completo di e interpretacion di gobierno riba CFT su pensamento. Ademas gobierno ta repasa tur 4 punto menciona den e carta di 10 di april ultimo (lesa e puntonan aki), y ta splica kico nan a haci, y kico tur nan lo haci ainda. For di e carta ey, ta resalta atrobe cu nan no ta bay duna oido p.e. na e medida di solidariteits tax, cu CFT ta pidi.

CRITERIO CONCRETO

Segun gobierno, e criterio concreto cu CFT ta uza (pa midi e presupuesto su efectividad), ‘ta e normanan estableci pa e deficit financiero, relativo na e GDP (Bruto Binnenlands Product) manera poni den e asina yama ‘meerjarenraming’ pa por logra un presupuesto balansa duradero’. Y den cuadro di esaki, segun gobierno, ‘por lo tanto, gobierno ta vigila e ehecucion di e presupuesto hopi di cerca, pa logra un deficit financiero di -3.7% di e GDP, pa 2015, conforme e meerjarenraming.

CONSEHO DI CFT/IMF

Tambe gobierno ta sigura cu ta ‘haci bon uso di consehonan di instancianan independiente manera CFT y IMF. Esaki ta den liña grandi e contesta final di gobierno riba e di dos carta cu parlamento a manda awe merdia, pa haya claridad riba e posicion di gobierno entorno su aplicacion di e consehonan di CFT den e presupuesto 2015. Lesa e ultimo carta di gobierno aki.