Explosion den fornu na Goddard Catering (ex Calloway) awe mainta

ORANJESTAD – Un explosion den un forno den e parti di pastry, a manca e operacion conoci di catering na aeropuerto, Calloway awe mainta. Informacion cu NoticiaCla.com a logra compila ,ta cu un posibel leak di gas, por tabata e causa di e explosion aki. Segun informacion di fuentenan fidedigno a splica NoticiaCla.com, menos mal no tabatin ningun hende den e camber di e fornu, sino cosnan por tabata mas pio. E explosion a causa basta daño si, y manca e operacion parcialmente den ora di mainta.

OPERACION

Pa por a sigui draai, mester a minimalisa e proceso di cuminda pa e varios outlet nan cu nan ta sirbi, manera General Store na Camacuri y otronan. E otro dos facilidadnan a wordo sera, y uno a wordo uza pa procesa e cuminda cu tin cu wordo sirbi na nan clientenan manera KIA. Bombero y personal di DTI a yega na e sitio y a traha mesora pa asesora.

COMPANIA

Ta for di 1 di februari ultimo, e compania di Barbados, Goddard Catering Group, a tuma e compania over, despues cu e compania a lanta na 1975. Na 1991 e la bira Calloway Corporation. E compania ta suministra cuminda na companianan manera American Airlines, Arkefly, Copa Airlines, Delta Airlines, Surinam Airways, Thomson Airways, Thomas Cook, Tiara Air, United Airlines, US Airways and GOL.