Na Corsou, polis a logra detene homber pa intento di asesinato di ex pareha

WILLEMSTAD - Un hòmber ayera den oranan di atardi a hinka su èks pareha malamente, pa despues e hui bai i ora polis a logra par’é, e kier a kita su mes bida dor di kòrta su pòlsnan.Den kareda di 5 or ayera  atardi polis a bai Havenstraat den Otrobanda pa un kaso di hinkamentu. Na e sitio a topa un dama bentá abou i tabata sangra bastante na brasa, barika i lomba. Segun investigashon rápido na e sitio, a sali na kla ku e dama su èks pareha lo a hinka esaki tres bes ku kuchú i despues el a hui bai for di e sitio. Polis a haña informashon ku e hòmber sospechoso lo tabata moviendo den un pikòp. Mientrastantu a pidi presensia di ambulans pa asina atendé ku e víktima i pa transporte pa sala di emergensia di CMC pa tratamentu médiko avansá. A komprondé ku e situashon di e víktima ta delikado. Polis a sigui mas aleu tras di e sospechoso i a bai direkshon di su kas, den área di Souax pa busk’é.Ora e unidat di polis di Rio Canario tabata bai e adrès di e sospechoso, a señal’é den un vehíkulo i a start un persekushon i a logra para e vehíkulo. Na e momento ei e sospechoso a kue un kuchú i a kòrta su pòlsnan. Polis na e sitio a dun’é asistensia wardando yegada di ambulans. Ambulans a yega na e sitio pa duna asistensia i pa despues transportá e sospechoso pa sala di emergensia di C.M.C., pa risibí tratamentu médiko mas avansá. Ayera nochi mes na Poli, polis a detené e sospechoso L.J. di 42 aña i a present’é dilanti di un fiskal ousiliar ku a ordená su enkarselashon. E ta keda akusá pa intento di asesinato. NOTA: E texto a wordo scirbi den Papiamento fonetico di Corsou.