Bermudez: Gobierno no ta adapta presupuesto 2015!

ORANJESTAD – Gobierno di Aruba no ta bay implementa mas medida den e presupuesto 2015. Esaki ta e contesta cu gobierno a manda bisa parlamento awe mainta laat (lesa e carta aki). Tabata minister di finanza Angel Bermudez a manda parlamento un carta casi diabierna merdia, informando cu gobierno ‘no ta bay haci ningun cambio substancial den presupuesto 2015’. Awe mainta mientrastanto, minister Otmar Oduber a confirma esaki tambe na NoticiaCla.com den un otro combersacion. Cu e contesta aki, parlamento ta den un situacion fastioso, pasobra nan ta interpret'e cu gobierno no ta cumpliendo cu e ultimo protocol firma.

BERMUDEZ

Elaborando mas den e carta ,Bermudez ta sigura di otro banda cu gobierno ta 'vigilando' ehecucion di e presupuesto hopi di serca. Y cada cuartal lo raporta e avance y progreso di e ehecucion di e presupuesto. Mes momento, e mandatario ta sigura cu si resulta cu tin cualkier desvio structural, gobierno mesora lo tuma 'medidanan corectivo' necesario pa sigura cu e ta den cuadro cu loke cu a priminti. "Ta mas cu claro cu nan lo ta den liña cu consehonan manera cu College Financieel Toezicht (CFT) a conseha segun nan carta di december 29, 2014 y e ultimo carta di 10 di april 2015. Cu esaki nan ta mustra cu nan (esta gobierno) ta sigui nan propio paso, y no ta laga nan mes wordo dicta door di CFT of otro instancia.  

CONTESTA GOBIERNO

NoticiaCla.com a compronde di su fuentenan fidedigno un rato pasa, cu parlamento lo contesta gobierno di Aruba riba nan carta. Aki nan lo mustra gobierno riba e hecho cu nan (gobierno) no ta cumpliendo cu e protocol, e articulo # 3 (lesa e parti aki), y como tal por spera problema. Ademas a compronde cu parlamento despues di a manda e carta pa gobierno, ta exigi un contesta rapido, y tanten cu e contesta aki no yega, no por continua cu tratamento di presupuesto.

CONSEHONAN CFT

Tur esaki ta birando un problema, pasobra segun interpretacion di parlamento, ‘ e maatregelen extra’, mester ta verwerkt den presupuesto 2015. Esaki segun e conseho y e punto 3 di e advies di CFT. Manera cu nos a raporta ayera caba, ta conoci cu tanten cu CAFT no ta cla, lo tin cu sigui e consehonan di CFT di Corsou. Algo cu segun minister Otmar Oduber a refuta awe mainta na NoticiaCla.com. Lo elabora riba esaki aki rato mas.