Sagicor ta celebra 35 aña na Aruba cu 5K Fun Walk

ORANJESTAD - E aña aki, Sagicor Life Aruba ta cumpliendo su di 35 aniversario, cu nan a observa den luna di mei, y nan lo celebra esaki, entre otro cu un 5K Fun Walk ariba diasabra, 26 di augustus. E evento ta start 5:30 pm, na Avenida Milo Croes # 106, banda di nos oficina. Nos ta organisa e evento aki cu e meta pa nos clientenan, publico y nos empleadonan pasa un atardi cu hopi alegria den un ambiente agradabel.

General Manager Randall Croes a menciona: “Nos ta hopi contento pa celebra un logro grandi cu nos coleganan y henter Aruba. Nos tin tremendo premionan pa duna e dia aki despues di e Fun Walk. Lo tin musica, un car show desde 10:00 or di mainta, un ehercisio pa warm up nos participantenan y hopi mas. Nos ta invita tur interesado pa registra na tempo prome cu esaki sera, pa sigura bo participacion na e evento historico aki.”

Participantenan por registra riba nan website: www.sagicor.com. Pago nan por wordo hasi por medio di nan partner IBISA. Contribucion pa e Fun Walk ta lo siguiente: Afl. 15.00 pa adulto y Afl. 10.00 pa mucha te cu 12 aña, cu e recibo di pago por pasa busca e t-shirt na oficina di Sagicor.

Registracion lo tuma lugar te cu dia 24 di augustus, y buscamento di t-shirt lo ta diaranson, 23 di augustus y diahuebs 24 di augustus, desde 9:00 am te cu 6:00 pm y diabierna, 25 di augustus di 9:00 am te cu 4:00 pm na oficina di Sagicor. Por fabor, corda bin cu e recibo pa por busca e t- shirt. Pa mas informacion por yama nos na 588-5042 / 582-7374 of scan e QR Code.

Tin lugar pa maximo mil participante na e evento aki, cu lo cuminsa desde 5:00 or di atardi cu un warm up.

Ta pidi pa tur particpantenan yega na ora. Ademas di e t-shirt, lo haya tambe un medaya como recuerdo pa bo participacion na momento di yega finish.

Lo tin premio nan atractivo manera “dinner for two”, cortesia di Pure Ocean (Divi Resorts) tambe un na Las Ramblas Restaurant (La Cabana) y tambe Aquarius Restaurant (Renaissance Wind Creek). Tin tambe un “weekend stay” na Talk of the Town Hotel. Tur hende mester ta presente na momento di saca premio cu e oportunidad di por bay cas cu un bon recompensa pa bo esfuerso. Tambe lo tin un premio pa e grupo mas anima.

Sagicor Life a wordo lansa na Aruba na mei 1986 bou di liderazgo di Sra. Marisella Bronswinkel cu tabata e General Manager escogi di e Aruba branch di Capital Life Insurance Company Limited. E branch a join e famia di Sagicor na 2004, birando un compania, Sagicor Life Aruba N.V. na 2007.