Despues di a detene nan riba laman, a laga tres sospechoso Venezolano den libertad

ORANJESTAD – Tres persona cu a wordo gara den fin di siman riba laman cu droga abordo di un boto, a wordo laga den libertad. Asina vocero di Ministerio Publico Ann Angela a raporta diamars mainta. Manera ta conoci, Warda Costa a intercepta un boto sospechoso cu tres persona y droga abordo den anochi di 12 pa 13 di augustus ultimo, despues di un persecucion riba lama grandi. 

Aunke e persecucion di e go-fast a cuminza den awanan teritorial di Aruba, e interceptacion a tuma lugar den awanan teritorial di Venezuela. Warda Costa no ta autoriza pa detene sospechosonan cu no ta riba teritorio di Aruba.

E tres personanan a wordo poni den libertad y entrega na warda nos costa pa wordo saca di Pais. E droga a wordo destrui conforme procedimiento di trabao.