A.T.A: Aruba a recupera 108% di su turismo compara cu 2019

ORANJESTAD – Segun cifranan difundi pa Oficina di turismo di  Aruba, (ATA), den luna di juli 2023 nos destinacion a ricibi un total di 111,862 bishitante “stay-over”. Si compara luna di juli 2023 cu juli 2019 - cu tabata e ultimo aña normal di turismo, por mira cu Aruba a recupera 108% di locual a wordo ricibi na juli 2019, cu ta indica un crecemento di 8%. Si compara juli 2023 cu juli 2022 por wak un crecemento di 3%.

AVERAHE DI PATRONCHI DI GASTO PA CADA BISHITANTE DEN Q2 2023

ATA ta sigui raporta cu visa credit card su averahe den gasto pa cada cardholder a yega na un suma di $625 den Q2 si compara cu $667 den Q1 2023. Mastercard su averahe den gasto pa cada cardholder a yega na un suma di $691 den Q2 si compara cu $740 den Q1 2023.

MERCADONAN Y CATEGORIANAN DI ACOMODACION 

Den juli 2023 83% di e total di e bishitantenan “stayover” pa Aruba a bishita for di Norte America, 6% a bishita for di Europa, 9% a bishita for di Latino America y 2.4% tawata procedente di otro partinan di mundo.  Mirando e categorianan di acomodacion, den juli 2023 27.5% di bishitante a keda den hotelnan European Plan, 17.7% a keda den hotelnan All-Inclusive, 29.5% a keda den Timeshare y 25.2% a keda den otro tipo di acomodacion, conoci tambe como vacation rentals.