Huez a pospone caso di malversacion ambtenaarnan

ORANJESTAD – E caso di dos persona ambtenaar halto cu a malversa placa, y un persona na KPA tambe cu a malversa placa, no a continua ayera. Matutino Bon Dia ta raporta cu debi na falta di documento a hunga un papel y falta di tin un abogado tambe , tabata motibo suficiente pa e hues pospone e tratamento di e caso. E caso awor a haya un fecha nobo, cu ta te despues di e receso di Corte, esta na augustus. No obstante, hues a trata e caso ‘pro forma’ pues sin e sospechosonan y sin bai den detayes di e caso mes.

FALTA DI DOCUMENTO

Un di e problemanan tabata cu e hues cu mester trata e caso, no a haya e documentonan di e caso na tempo, y como tal no por a prepara su mes debidamente. Como tal e la bisa ayera cu e mester tin mas tempo pa por haci e preparacion.

FALTA DI ABOGADO

Un otro problema encontra, ta cu un di e sospechosonan lo no tin abogado pa defende. A resulta cu falta di placa ta un problema, y cu e sospechoso a bisa cu pesey e no por paga un abogado. Aki hues a recorda e persona cu e por haya un abogado liber pa haci e trabou pe.

PROPIEDAD

Loke a sali na cla tambe ayera ta cu fiscal a indica cu ta su intencion di kita propiedad di e sospechosonan, pa asina por sikiera haya algo di e placa cu e sospechosonan ta sospecha di a horta. Segun e fiscal, ta trata di sumanan di riba 100 mil florin. Como tal un di e formanan cu lo por haya placa, ta door di pone beslag riba e propiedadnan y asina sigura cu por haya algo.

E CASO 

E caso mes, manera NoticiaCla.com a trece dilanti, ta trata di trahadonan di gobierno ta dilanti mesa berde pa motibo di a comete un of otro tipo di fraude, envolviendo sumanan cuantioso di placa. Den e caso aki ta trata te hasta di personanan cu tin posicion di confiansa, esta un hefe di un hulpsbestuurskantoor na Noord, y e otro un hefe suplente/hoofdkassier. E biaha aki ta trata di e damanan M.M.G., L.M.K. y I.U.M., cu lota dilanti mesa berde awe pa motibo di posibel fraude, ocasiona den un departamento di gobierno. E di tres tabata traha na Korps Politie Aruba KPA, aunke cu no ta trata di un polis sino den personal administrativo.

HEFE NA HULPSBESTUURSKANTOOR

Den e prome caso .G. ta wordo acusa di, conhuntamente cu un otro of otronan, den e periodo di prome di september 2012 te 18 di december 2012 y den su funcion di hefe di un oficina di gobierno, a malversa un suma di placa di 109.088,-- florin, perteneciendo na WEB, y un suma di 10.918,-- florin, perteneciendo na Setar, of a intencionalmente permiti un otro pa malversa esaki. G. ta wordo acusa di como hefe di e oficina di gobierno, a intencionalmente keda sin controla e deposit(nan) haci pa un of mas otro trahador di e oficina y/of a keda sin tuma accion a base di su mes observacion y/of informe di web of setar.

HEFE SUPLENTE

K. ta wordo acusa di, conhuntamente cu un otro of otronan, den e periodo di prome di september 2012 te 18 di december 2012 y den su funcion di controlador y/of hoofdkassier y/of hefe suplente di un oficina di gobierno, a malversa un suma di placa di 109.088,-- florin, perteneciendo na web, y un suma di 10.918,-- florin, perteneciendo na setar, of a intencionalmente permiti un otro pa malversa esaki. E ta wordo acusa di como controlador y/of hoofdkassier y/of hefe suplente di e oficina di gobierno, a intencionalmente keda sin controla e deposit(nan) haci pa un of mas otro trahador di e oficina y/of a keda sin tuma accion a base di su mes observacion y/of informe di web of setar. Tambe e ta wordo acusa di, den e periodo di 5 di november 2012 te 6 di december 2012, conhuntamente cu un otro of otronan, a falsifica formularionan di deposit di un banco na valor total di mas di 10.000 florin.

KPA

Den e caso di e malversacion na KPA, tin e persona M., cu ta wordo acusa di, conhuntamente cu un otro of otronan, den e periodo di prome di februari 2011 te 24 di october 2012, den su posesion di ambtenaar na polis, a intencionalmente malversa un suma di mas of menos 46.000 florin.