Temporada di horcan 2023 actualisa awor pa uno cu mas tormenta!

MIAMI /ORANJESTAD – E pronostico pa temporada di horcan 2023 pa Caribe a keda adapta y a intensifica esaki considerablemente. Esaki kier men cu por spera aun mas accion cu ya tabata pronostica. Asina e departamento meteorologico Mericano a anuncia e fin di siman aki. E motibo ta e condicionan di tempo cu a cambia y a registra temperatura super mas cayente di laman. Esaki a pone cu awor e pronostico ta oficialmente adapta pa ‘mas cu normal’ di actividad for di ‘casi normal’. 

E CAMBIO

E pronostico awor ta inclui 70% chens pa entre 14 pa 21 tormenta cu nomber, di cual entre 6 pa 11 por bira horcan y di cual entre 2 pa 5 por bira horcan serio. Aunke formacion di ciclon por sosode cualkier tempo di aña, e temporada oficialmente ta core di 1 di juni pa 30 di November di e caña calendario. Pero den 2023, cos a cuminsa hopi tempran, ora cu National Hurricane Center a emiti un anuncio pa un sistema panort di Bermuda. E la dura cortico si, di apenas un dia. 

TORMENTA

Oficialmente e temporada aki a conoce un total di 4 tormenta cu nomber caba den e prome 6 siman di e temporada, di cual 2, Bret y Cindy a forma den e parti oost di Caribe den juni, cu ta un record. Despues den juli, a registra e prome horcan.