Hotel Iberostar Aruba a anuncia nan prome sponsorship pa pasantia den exterior

ORANJESTAD - Recientemente, representante di hotel Iberostar Aruba, Sra. Ghislaine de Windt a indica cu nan ta orguyoso di anuncia sponsorship pa prome grupo di studiante. Parti di nan compromiso ta pa fomenta talento hoben di Aruba. “Nos a brinda alohamento completo y sosten pa nos studiantenan durante e periodo di pasantia”, Sra. de Windt a expresa. Diamars ultimo, seis (6) studiante di Sector Ciencia y Tecnologia di Colegio EPI a biaha pa eherce nan pasantia na Iberostar Playa Paraiso na Riviera Maya, Mexico. Proximamente, tres (3) studiante mas di Sector Hospitalidad y Turismo lo ta biahando. E studiantenan selecta lo haya un experencia practico, valioso y inolvidabel na Mexico. Cu esaki Iberostar Aruba ta duna bek na nos comunidad door di inverti den e futuro lidernan di Aruba. Sra. de Windt a expresa cu no por a logra esaki sin ayudo di Gobierno di Aruba y Colegio EPI. Den futuro Iberostar Aruba lo sigui yuda otro studiantenan pa eherce nan pasantia den exterior y asina contribui den nan desaroyo profesional.