Na Corsou, Corte a duna minister razon pa anula cobransa di belastingnan bieu

WILLEMSTAD - Minister di Finansa a haña rason den su desishon pa anulá tur debe di belasting ku tabata pendiente for di 2017 i mas bieu. Ayera den un desishon di korte desishon a kai ku, aanslagnan di belasting di añanan 2017 i mas bieu definitivamente no por ser kobrá mas. Ku esaki a bini klaridat pa tur pagadó di belasting ku a kai bou di e kasonan ‘eksepshonal’ ku a keda publiká dia 3 di aprel 2023.

T’asina ku na prinsipio dje aña aki Servisio di Ontvanger a disidí ku lo repasá i limpia e lista di kobransa. E lista aki tabata di tal magnitut ku el a suma un montante di Nafl. 5.7 miar, loke a pone ku e lista aki a para bira algu inkontrolabel i sin por manehá. Teniendo kuenta ku esaki, tabatin mester di un medida drástiko pa por a hisa efektividat di kobransa di belasting i primanan sosial.

Segun un deklarashon di Minister di Finansa, pa hopi aña a hiba un maneho di kobransa selektivo i inisiativanan pa hisa e kumplimentu ku pago di belasting a stanka promé ku tempu, loke a kondusí na e situashon ariba menshoná. Pero e aktual titular di finansa drs. Javier Silvania a disidí ku e lo pone un fin na e práktika i kultura aki, i asina for di dia ku el a sinta el a pone komo meta pa alsa e kumplimentu ku pago di belasting.

Mas aleu e ta bisa ku, OECD, ku a hasi diferente investigashon internashonal riba e efektividat di kobransa di belasting, a konkluí na 2019 ku e grado di éksito pa loke ta kobransa ta baha miéntras ku e tempu ta bai. E konklushon aki ta algu ku ta konta tambe pa Kòrsou. Despues di 2 aña e grado di éksito pa kobransa di un aanslag ta ser redusí ku un 50 porshento. Aanslagnan ku tin di haber ku aña 2017 i mas bieu lo mester a ser kobrá hopi tempu promé i no te na 2022 i 2023.

Pa usa e energia dje aparato di kobransa mas dirigí riba aanslagnan mas nobo ku tin un chèns mas grandi pa ser kobrá, konforme e konklushonnan di OECD, Ontvanger a disidí pa para e kobransa di aanslagnan di añanan fiskal 2017 òf mas bieu. No opstante e media aki ta parse unu hopi riguroso, ta resultá ku e loke a ser kobrá e aña aki na belasting ta muchu mas haltu ku na 2022.

Segun e karta aki, denter di e servisio di impuesto mes for di momentu ku e gobièrnu aki a sinta tabatin pasonan grandi a ser hasí pa limpia e listanan di tantu Inspekshon di Impuesto komo Ontvanger. Pa e aña koriente tin diferente akshon planiá pa kita retrasonan atministrativo i pa medio di outomatisashon i análisis di dato mehorá e kalidat dje servisio duná dor di Servisio di Impuesto.

Tambe riba tereno di efektividat di kobransa di belasting i primanan lo bai tin kambionan grandi den e próksimo lunanan. Dor di e negligensia di hopi aña di parti di Servisio di Impuesto lo bai kosta un tiki esfuerso si pa drecha e daño hasí. NOTA: Texto ta scirbi den Papiamento fonetico di Corsou.