IMF: Sin medida adicional, deficit fiscal di Aruba lo sigui halto

WASHINGTON – Mientras cu Aruba ta recuperando gradualmente di un recesion di dos cifra, Fondo Monetario Internacional (IMF) ta bisa cu e prioridad inmediato mester ta pa reduci e debe di Aruba. Asina IMF ta inicia su rapport pa Aruba  pa 2015 ,-cu no a cambia mucho di esun emiti na februari- , publica awe tardi riba su website. IMF ta reconoce e hecho cu tin reforma structural grandi cu a tuma lugar, pero toch debe di e pais a surpasa 80% di e GDP den 2014. Como tal ta sugeri pa tuma medida adicional pa aumenta e entrada y reduci gasto, pa por logra e consolidacion fiscal desea. “Sin medida adicional, deficit fiscal lo sigui halto, y debe lo continua cu un aumento riba termino medio.

STRUCTURA FISCAL

Y mientras cu IMF ta reconoce cu ta Aruba su turismo fuerte a yuda e isla grandemente, e ta mes momento e risico grandi di e isla, debi na e dependencia grandi di e isla na turismo. (Aruba ta e di tres pais mas dependiente di turismo na mundo, segun IMF) Como tal Aruba ta keda vulnerable pa e efectonan externo. IMF ta aprecia e plan di ahuste ambicioso riba termino medio di gobierno, pero esfuerso sostenibel fiscal ta necesario te por lo menos 2020 pa logra cu e debe por sigui bay ‘abou’. Pa logra esaki, mester establece un structura fiscal formal a termino medio, pa aumenta e credibilidad di e plannan aki.

ESFUERSO DI GOBIERNO

E rapport di IMF ta sigui elabora riba e esfuersonan cu Aruba a haci, y e recuperacion experencia durante e ultimo 5 añanan. E ta haci mencion di un recuperacion den 2013 cu a stagna na 2014. Incertidumbre fiscal, y falta di inversion ta un di e motibonan di esaki. Debe externo a disminui te 105% di e GDP. IMF ta sigui relata e loke cu gobierno a haci na 2014, pa por drecha e situacion, repasando e reformanan manera AOV, APFA y mas.

INFLACION

IMF ta proyecta un crecemento te 2.25%. E sector turistico ta premira un aumento aunke chikito. Aunke cu prijs di petrolio ta abou, e tarifa di coriente y introduccion di e health tax, e lo aumenta e tasa di inflacion te .75% na 2015. Lesa e rapport completo aki.