Corte: Corant no mester rectifica contra minister

ORANJESTAD – Huez ayera a rechasa peticion di minister di enseñansa Michelle Winklaar pa haya rectificacion di e corant Solo di Pueblo. E corant lo a publica articulonan relaciona cu e cambio di seguro di studiantenan na Hulanda cu lo no ta corecto. E hecho cu e mandatario no a reacciona mesora, huez a indica, ta pone cu e no a mira e urgencia pa trata esaki den un kort geding. E caso probablemente lo continua den un bodem procedure. Mientrastanto, e mandatario tabata evaluando pa apela e sentencia aki.

INVESTIGA IRREGULARIDADNAN

Interesante loke a bin dilanti, ta e detayenan di e proceso di cambia compania di seguro pa e alumnonan. Segun e corant, nan a ‘nota’ varios iregularidadnan den e proceso y a cuminsa investiga esaki. Pa mas cu un luna, cuminsando na december di aña pasa te mitar di januari, e corant a keda insisti riba e asunto aki. For di acusacion di con e destaho publico a tuma lugar, te na e existencia di e compania ‘fantasma’ di seguro (no tabata existi ora di e destaho, pero si a gana e destaho), te na conflicto di interes, pasobra e casa di e minister ta conoci cu e doño di e compania di seguro na Hulanda. Tur ta puntonan cu e matutino tabata cuestiona y manda pregunta pa e minister contesta. E mandatario no a haci esaki, y como tal e corant a tuma esaki como ‘aceptacion’.

BLANCO DI CRITICA

E mandatario, reaccionando na NoticiaCla.com, a admiti cu “for di e momento cu mi a habri e caso di seguro di studiante den un destaho publico (despues di 20 aña cu e mesun compania), cu e lo a conduci na acusacionnan falso”. “Tur esaki pasobra mi casa ta traha pa un compania di seguro. Esey tabata e risico cu mi tabata dispuesto pa tuma, pa haya un miho deal pa e studiantenan” Hooyboer a bisa NoticiaCla.com . “Nunca mi no a wordo acerca cu pregunta riba esaki, prome cu nan (Solo di Pueblo) a publica algo. Mi ta evaluando si mi ta apela e caso awo” e mandatario a sigui bisa.

SENTENCIA

Mirando cu huez no a mira e necesidad di trata e caso aki den un forma di caso sumario, a rechasa e demanda di Michelle Winklaar. Esaki ta nifica cu e corant no mester rectifica, y tampoco manda un carta di disculpa pa e mandatario, y tampoco pag’e 10 mil florin.