Plasterk a entrega protocol CAFT na Tweede Kamer awe

DEN HAAG – Awe mainta Tweede Kamer a ricibi e protocol (lesa e protocol aki) firma entre Hulanda y Aruba, di dia 2 di mei ultimo. Pa medio di un carta (lesa e carta aki), minister hulandes Ronald Plasterk a ofrece esaki na e presidente di Tweede Kamer. Loke falta awo, segun Plasterk, ta e rekeri mas elaboracion, manera e nombracion di e miembronan di e College Aruba Financieel Toezicht, y traha e respectivo ley pa CAFT, door di parlamento di Aruba. “Mi lo informa Kamer riba e progeso, asina cu e pasonan basa riba e acuerdo aki, wordo tuma”, Plasterk a sigui bisa. Notable ta tambe e hecho cu riba e version di e protocol aki, tin e firma di minister Mark Rutte, cu a firma na nomber di Jeroen Dijselbloem, cu ta den exterior. Pues awor e protocol, ta completo.

ACUERDO/PROTOCOL

Manera ta conoci, gobierno di Aruba y Hulanda a haya otro riba loke mester bira e supervision financiero di nos pais diasabra ultimo. Diasabra merdia prome cu e delegacion hulandes a bandona Aruba, Minister Ronald Plasterk y e delegacion di Aruba a firma e acuerdo valido te 2018, cu tin cu bira un ‘landsverordening’, cu lo hiba e nomber di AFT (Aruba Financieel Toezicht). E lo por opera manera cu e actual College Financieel Toezicht ta opera. E tabata algun ora di basta tension, pero cu finalmente a resulta den un acuerdo cu ambos pais por biba cune.

REUNIONAN INTENSO

For di diahuebs siman pasa, e super ambtenaar Richard van Zwol tabata reuni intensamente na Aruba pa logra un acuerdo. Entre e actividad di Sail Aruba, tambe por a nota combersacionan intenso entre gobierno di Hulanda y Aruba, cu finalmente a culimna diabierna anochi laat den un reunion di conseho di minister di Aruba di ultimo ora. E reunion no a bay bon y a palabra cu lo a continua despues. Den oranan di marduga e reunionan aki a continua y a lanta e diasabra mainta ey ainda cu problema.

MENASA DI RETIRO

E problemanan tabata di tal gravedad cu varios menasa a cay. Entre nan prome minister di Aruba a ricibi un carta ayera nochi laat di minister Otmar Oduber cu si gobierno di Aruba firma e acuerdo segun normanan di Hulanda, e lo entrega su retiro. Finalmente a traha henter mainta pa por a logra algo prome cu e delegacion hulandes bandona Aruba diasabra merdia/atardi. Den curso di diadomingo, gobierno a divulga e detayes di e protocol firma.