Kiwanis Club of Palm Beach ta presenta e di 3 edicion di Ride4Kids

PALM BEACH – Kiwanis Club of Palm Beach ta comunica na pueblo di Aruba su evento di Ride4Kids cual lo ta e di tres edicion e aña aki. E ta un FUNdraising cu a cuminsa den 2020 y debi n’e exitonan di e prome dos edicionnan, lo ripiti esaki cu e meta pa haci esaki anualmente.

Sr. Rothmar Coenraad, Chair di e Ride4Kids comite, a splica cu te cu awo tin 10 miembro di Kiwanis Palm Beach y 26 no miembro cu lo bay core pa recauda fondo rond di Aruba. Sigur e grupo no lo keda e cnatidad aki mirando e causa cu lo core pe y e meta cu kier cumpli cune. Manera ta conoci, tin stichting cu a subi nan schoolgeld y ta hacie tiki mas dificil pa mas mayornan por cumpli. Pa Kiwanis Club of Palm Beach, e decision di na unda e fondo aki mester bai tawata mas cu claro y un biaha mas kier sostene e alumnonan de menos recurso, pa asina e mayornan tin un peso menos riba nan cabes e aña escolar 2023-2024.

Kiwanis Palm Beach tin nan meta y danki na Guardian Group y FLY Fit Studio pa e sosten cu e projecto ta riba bon caminda. Pero mester mas ayudo di comunidad. Tin diferente manera cu por contribui n’e causa aki. Por haci un donacion pa un suma fiho of un suma pa kilometer. Tur persona of compania cu kier haci un contribucion por click riba e link aki: http://kcpb.kiwanisfundraisers.com/Ride4Kids, yena e informacion, selecta un of mas coredor y haci bo donacion.