CFT: Tur palabracion cu CFT ta keda activo te ora CAFT nace

WILLEMSTAD – Tanten cu College Aruba Financieel Toezicht (CAFT) no wordo crea y cuminsa funciona, College Financieel Toezicht (CFT) ta sigui funciona normal. Esey ta nifica tambe cu gobierno di Aruba tin cu tene su mes na palabracionnan haci cu CFT na december ultimo. Asina CFT, riba preguntanan di NoticiaCla.com awe tardi laat, a splica con ‘cos ta hinca den otro’ despues di e protocol di 2 di mei, entre gobierno di Hulanda y Aruba.

KICO TA PASA CU CFT

Un di e incertidumbre nan cu a wordo crea (aunke cu e protocol ta hopi cla), ta cu si awor cu a firma e protocol pa forma CAFT, si CFT su trabou ta para si of no pa cu Aruba y e presupuesto 2015. “Ainda no tin CAFT” e contesta di CFT tabata. Nan ta recorda tambe cu “den e palabracionnan cera entre Hulanda y Aruba, lo tin un CAFT prome cu 1 augustus”. “Te e tempo ey, CFT ta sigui traha normal, basa riba e palabracionnan haci na december ultimo”. Aki CFT ta referi na e palabracionnan di 29 di december 2014.

DUDA

Y si tabatin cualkier duda ainda, CFT a cita e protocol firma diasabra: “De hecho, e palabracion # 3 di e lista di palabracion , ta confirma esey tambe pa loke ta e presupuesto 2015”. Como tal, CFT ta mustra cu nan consehonan pa cu e presupuesto 2015, y su implementacion, ta keda valido y cu gobierno di Aruba tin cu cumpli cu nan segun palabracion. Esey ta inclui entre otro e 4 ultimo recomendacionnan haci

CAFT NA CORSOU OF ARUBA

E pensamento cu si CAFT ta traha bou di CFT, for di Corsou, ainda no ta determina. “Loke ta bira e ‘diseño’ di CAFT, ta depende di e contenido di e ley (cu tin cu wordo traha ainda), riba cual substantivamente, tanto Hulanda y Aruba a yega na un acuerdo caba.Lesa e protocol firma dia 2 di mei, aki.