Fazio: Inversion di 150 miyon den 5 aña den aeropeurto

ORANJESTAD - Inversionnan miyonario di parti di Aruba Airport Authority N.V. (AAA) den e proximo dos pa cinco aña lo percura pa eficiencia den procesonan cu ta duna realce na e experiencia personal di e biahero. James Fazio, CEO di AAA a duna splicacion na e participantenan di conferencia di turismo pa Merca y Canada (ATCA 2015) tocante e diferente proyectonan cu ta den diferente fase di planning y ehecucion na Aeropuerto Internacional Reina Beatrix pa cu inversionnan pa un total di entre 100 pa 150 miyon dollar Mericano. E cambionan den e diseño di e aeropuerto lo ta impactante.

EXPERIENCIA DI PASAHERO

“E experiencia di e pasahero y su deseonan ta nos prioridad”, asina Fazio a sigui bisa. El a subraya e cambionan esencial den e proceso di inmigracion y siguridad pa pasaheronan cu ta "US-bound", uzando pre-clearance. “E crecemento den cantidad di pasahero mester percura pa un procesamento di pasahero mas eficiente y pues ta trahando pa elimina e “baggage claim” prome cu pasa inmigracion Mericano, como tambe e di dos chekeo di siguridad, Fazio ta remarca. Esaki ta un proyecto cu lo dura algun aña y ta spera di por cuminsa cu construccion na cuminsamento di otro aña, segun Fazio. E sistema di ekipahe ta e “centerpiece” di e proyectonan cu mester tuma luga na un aeropuerto cu ta funciona den un sistema sostenibel.

BENTANA DI OPERACION

Fazio a splica cu e “bentana” di operacion pa aeropuerto ta di 8 ora diario, mas vuelo y mas pasahero no lo cambia esaki, pasobra simplemente no por distribui e vuelonan over di mas ora. E ta keda un situacion un poco tradicional y pues mester busca forma nan pa maneha e fluho di pasahero miho. Aki ta unda e cambionan den e sistema di ekipahe ta bira esencial, pero tambe cambionan den puntonan di benta di cuminda y bebida y mercancia den aeropuerto mester tuma luga.

SERVICIO F&B

Mehoracion di e programa di cuminda, bebida y mercancia ta mehora e entrada cu ta bin for di actividadnan “no aeronautico” pa Aruba Airport Authority y ta importante pa yuda mantene e “airport rates and charges” na un nivel competitivo pa futuro, Fazio a subraya. Mas y miho servicionan di cuminda, bebida y mercancia tambe ta importante ora percura pa fluho di pasahero ta mas eficiente y rapido, como cu e pasahero lo kier haci mas uzo di e servicionan aki, pero mester tin nan disponibel tambe.

PROYECTO WIFI

Ademas, e CEO di Aruba Aiport Authority a elabora tocante servicionan di Wi-Fi y stacionnan pa charge aparatonan electronico, como cu esakinan ta elementonan cu ta pertenece den cualkier aeropuerto di clase mundial awendia. Aruba tin un compromiso pa pertenece den e mesun categoria di e aeropuertonan di e nivel aki. E inversionnan cu Fazio a menciona ta grandi. El a bisa enfaticamente cu e meta ta pa e fluho di entrada sigui stabiel na aeropuerto y nan tin confiansa cu por cumpli cu e inversionnan aki debidamente. Fazio a conclui bisando cu “streamlining” e proceso di inmigracion y siguridad ta un compromiso cu aeropuerto tin cu su usuarionan y lo ta aplicando sistemanan automatisa y otro tecnologia necesario pa cumpli cu e promesa y compromiso aki, pasobra esaki ta e forma pa sigui padilanti. Otro desaroyonan cu el a presenta na e delegadonan di ATCA ta: E programa piloto pa pre-clearance pa paisnan di Union Europeo, esta “Happy Flow” cu lo cuminsa dia 28 di e luna aki y e renobacion di e sala di yegada cu un reorganisacion di boothnan di inmigracion y ponemento di un “transition ramp” unda tin e trapinan awendia.