“Mastermind” tras di kiebro di Girobank na Corsou a haña 12 aña castigo di prizon na Merca

WILLEMSTAD - E ‘mastermind’ tras di e aktividatnan froudulento ku a yuda kibra Girobank aki na Kòrsou, den e kaso aki David H. a kai sera na Merka i a haña sentensia pisá pa e mesun tipo di aktividatnan aki. Den e kaso aki nos ta papia di 12 aña di kastigu tras di trali. T’asina ku David H. huntu ku Martin S. tabata e protagonistanan prinsipal tras di International Investment Group (IIG) i tabata spesialisá den finansiamentu pa hasimentu di negoshi di término kòrtiku i tambe fiansanan komersial riba merkadonan ku ta lantando.

Ku tempu IIG a bin deskubrí i saku Kòrsou tin un Girobank ku tabata un banko relativamente hóben i chikí, i asina a mustra interes pa kumpra akshonnan serka total Bank, ku tabata e akshonista mayoritario di un grupo di invershonista Venezolano.

E tempu ku IIG a mustra interes Banko Sentral den su proseso di ‘screening’ di IIG komo akshonista nobo a pidi diferente kos i tambe a pidi e grupo pa duna un splikashon pa loke ta su interes komo entidat di invershon i komo akshonista di banko. For di investigashonnan mas aleu dor di Banko Sentral algun aña despues ta bin resultá ku e fondonan di e transakshon aki parsialmente a Sali di Girobank mes ($80 mion). Den esaki tabatin diferente kuenta bankario ku nan a mishi kuné mediante un supuesto “loan carousel”.

Pero e konsekuensia di esaki tabata ku tin kuentanan di hopi kliente a keda ku buraku (na rason di $19.1 mion). Tin un doño di kadena di hotèl aki na Kòrsou ku a sufri pèrdida e tempu ei debí ku e direktor dje tempu ei a abusá dje konfiansa di por a mishi ku su kuentanan. Tambe CEO Girobank a ekstraé plaka di diferente banko Venezolano ku tabata den bankarota òf bou di kuratela. Tabata e tempu mei ku na airopuerto a bin deskubrí un kargamentu mionario di plaka kèsh serka un konosido kompania ku ta rekolektá i transportá plaka aki na Kòrsou. Tabata e intenshon pa e plaka ei a bai riba un kuenta na Malta.

Aktividatnan na Merka:

Pero ta pa mas ku un dékada David H. i Martin S. a defroudá nan klientenan, hòrtando na rason di mas ku $100 mion na supuesto plaka di invershon. Nan tabata krea fiansanan fiktisio tambe pa honra klientenan ku no tabata eksistí. Den términonan finansiero na Merka nan ta yama esaki un “Ponzi Scheme”. Kaminda tabata nesesario nan tabata falsifiká dokumentonan. Na mart 2020 e duo a keda detené na Merka i a ser konfrontá ku un lista (7) di akusashon.

Den e kaso aki David a keda sentensiá na 12 aña di prizòn, i ku e mester paga $129 mion bèk na restitushon pa esnan ku el a perhudiká. Martin a haña un sentensia muchu mas abou di 13 luna di prizòn ya ku ta David tabata e “mastermind” tras di henter e operashon aki. No ta konosí si e akshonistanan Gobièrnu di Kòrsou i APC ta na altura mes te pa nan a entregá keho. NOTA: Texto ta scirbi den Papiamento fonetico di Corsou.