Pa 20 aña caba avionnan internacional por registra na Aruba

ORANJESTAD – E compania priva cu ta registra avionnan pa Aruba a cumpli 20 aña recientemente. Ta trata di e compania ‘The Registry of Aruba’ estableci na 1995, cu na cabes Jorge Colindres. E ta e prome programa di registra avion, rated Categoria -1 pa FAA. E ta registra avionnan priva y comercial, cu un peso di take off minimal di 6.7000 kilo. Avionnan bou di e kilaje ey, por registra na Aruba tambe cu aprobacion special di DCA.

BENEFICIO

Entre e beneficionan, ta registra e avion cu e letternan P4 (papa 4) - y despues e doño por personaliza esaki mas aleu. Ademas avionnan registra na Aruba, no obstante nan peso, por wordo exclui di belasting, of invoerrechten, si e avion no ta opera of tin su base na Aruba. Avionnan comercial por registra na Aruba y opera na Aruba cu un AOC arubano. E proceso pa registra un avion na Aruba, ta tuma 24-48 ora, despues cu e inspeccion di su navegabilidad (di e avion) ta completa, tanten cu tur documentacion ta satisfactorio.

CLA MAS LIHE

Pa facilita e proceso di registracion mas ainda, Aruba a funda e proceso ‘true certified copy’, cu ta duna e doño di e avion e flexibilidad pa bula nan avion asina cu e inspeccion di navegabilidad ta completa. E ta haya un copia di e certificado, valido pa 15 dia for di momento cu e documento a wordo entrega.