Problema di coriente ‘brownout’ na Corsou diahuebs tabata entre Nijlweg y Mundu Nobo

WILLEMSTAD - Komunidat di Kòrsou a bolbe hañ’é ku un situashon di interupshon den suministro di koriente ayera. T’asina ku ayera mèrdia den kareda di 1or komunidat di Kòrsou a ser konfrontá ku otro situashon di interupshon di koriente. Den promé instante no tabata sa ku eksaktitut kiko ta e problema, i solamente por a bisa ku e orígen tabata entre e stashon di Nijlweg i Mundu Nobo. Sr. Ray Seferina di e tim di maneho tékniko di Aqualectra a splika na prensa entre otro ku no a trata di un ‘blackout’, aunke ku gran parti di nos isla a keda sin koriente pa algun ora. El a papia di 70% di esnan ku tin riba ret.

Sr. Seferina a splika ku e supstashon di Nijlweg ta un dje sentronan (lood center) prinsipal ku ta risibí loke ser produsí na koriente, i for di aki e koriente ta keda distribuí pa e diferente otro stashonnan den diferente bario. Pues dor ku e stashon prinsipal na Nijlweg a ser abastesé mas, e no por a sigui distribuí tampoko pa e otro supstashonnan, i asina a surgi e problema. Te na momentu ku Aqualectra a ofresé e enkuentro ku prensa aki, ku tabata mas o ménos 2or di atardi, no tabata konosí ku eksaktitut kiko a sosodé. E momentu ei no por a bisa nada konkreto ya ku pa koinsidensia Aqualectra a yama un konferensia di prensa pa ayera 2or kaminda lo mester a elaborá riba otro temanan. Unabes prensa tabata invitá a konsentrá riba e tema di interupshon di koriente djayera.

Durante oranan di atardi/anochi Aqualectra a sigui duna informashonnan aktualisá dje situashon di koriente, i EXTRA por bisa ku den kareda di 6.30or un 90% di barionan tabatin koriente atrobe.

Di parti di prensa a puntra sr. Seferina si ta koinsidensia ku kada bes ku tin interupshon di koriente, ku esei ta sosodé riba un djaweps. E tékniko a deklará ku no tin un relashon den esei i ku ta puru koinsidensia. Loke ta sosodiendo aktualmente ta ku Aqualectra ta hasiendo trabounan di reparashon i adaptashonnan na diferente parti di Kòrsou, i esei ta algu ku e kompania tabata bai kompartí ku Prensa. Ultimo biaha ku a surgi un ‘blackout’ e problema a sinta den e stashon na Mundu Nobo i aki lo mester a bai hasi sierto trabounan. Pero e problema a presentá promé ku nan a kere. Pero Aqualectra ta hasiendo esfuersonan pa e ret rònt dje stashonnan ei ta stabil, di manera ku por hasi otro trabounan di mantenshon.

Pa loke ta e ‘blackout’-nan ku tabatin den pasado, segun sr. Seferina e situashonnan ei a keda resolvé pa evitá ripitishon. NOTA: Texto ta scirbi den Papiamento fonetico di Corsou.