Dowers: Caida den robo di auto pero aumento den atraco

ORANJESTAD – Cu muestra di cifra, polis por analisa miho den ki bario ladronnan ta mas activo of no. Minister di husticia Arthur Dowers durante e defensa di su presupuesto 2015, a indica cu cifranan awe ta miho disponibel compara cu antes. Pero ta buscando alternativa pa registra esaki miho. No obstante esey tin cifra cu ta demostra e patronchi di actuacion di ladronnan. Entre e cifranan cu e la menciona, tin cu e cantidad di kiebranan den cas tabata 896 na 2013 y na 2014 esaki tabata 881; Robo di auto na 2013 tabata 1306 mientras cu na 2014 el a bira 1065; atraconan na 2013 tabatin 35 y na 2014 e tabata 44.

PLAN DI MANEHO

Tambe el a bisa cu na diferente ocasion el a mustra y presenta e Plan di Maneho di Husticia na Parlamento y no ta compronde con ainda Parlamentario Bikker ta keda puntra riba kico ta e maneho. El a priminti di pone den un envelop bunita pa e Parlamentario haya. E ta un maneho cu e mandatario a bisa cu el a traha hunto cu e ekipo chikito di funcionarionan publico e tabatin na su disposicion. Sigur, no lo a logra bon cifra si no tabata e maneho cu nan a bin ta hibando.

CUESTIONA PREGUNTANAN DI PARLAMENTO

El a sigui bisa cu e relato anual di 2013 di Cuerpo Policial tin tur e cifranan di e trabou cu nan a haci den e aña ey y por lesa tur tipo di droga cu a wordo confisca y e cantidad di cada un. E ta un documento cu ta disponibel pa e Parlamentario. Pesey e no ta compronde di con cada biaha e mesun pregunta ta wordo haci.

Pa loke ta delito, el a sigui splica, nan tin cifranan cu ta mustra den ki bario e ladronnan ta opera, ki ora mayoria robo ta tuma luga y kico ta loke ta wordo horta. Pues debidamente Husticia tin estadisticanan cu nan por traha cune, contrario di tempo di gobernacion di MEP. Por ehempel, den Paardenbaai tabatin hopi auto a wordo horta den 2013. Pues Cuerpo Policial tin tur e tendencianan a base di cual por ataca e problemanan, contrario na loke oposicion ta bisa cu no tin ningun dato, segun e mandatario di husticia.Foto: http://photonews.do