Identidad victima accidente mortal awe mainta ta conoci

ORANJESTAD – E identidad di e hoben accidenta mortalmente na altura di rotonde Las Americas awe mainta, ta conoci. Un rato pasa, autoridad policial a informa cu ta trata aki di Frank Alfonso Riccioli Huguett, naci na Venezuela 27 november 1986, biba na paramira 15. Pues e tabatin 28 aña.

ACCIDENTE

Tabata awemainta, pa mas o menos 4'or di marduga, cu Central di Polis a haya un yamada y a wordo notifica cu un accidente basta pisa lo a tuma lugar un poco pariba di Rotonde Las Americas.Patrya di O'stad a wordo manda na e sitio y a bin constata cu en berdad un accidente a tuma lugar. Ta trata di un auto, un Yaris blanco numera A-53695, cu basta daño material. E chauffeur lo a baha caminda y dal contra un borchi di trafico (esnan grandi blauw cu ta dirigi trafico riba e diferente vianan) banda di caminda. E chauffeur no tabata duna señal di bida.

Mesora ta mobiliza tur e autoridadnan competente na e sitio, entre otro sub fiscal na warda, departamento di trafico, slachtofferhulp, etc y e investigacion ta cuminsa. Cu yudansa di Brandweer ta logra saca e victima for di e auto.

CONSTATA MORTO

Pa mas o menos 4'or y 45 Dr. Lin ta constata morto di e chauffeur, Frank Alfonso Riccioli Huguett  

VELOCIDAD HALTO

Probablemente velocidad halto lo a hunga un rol den e accidente aki ya cu a bin haya e bateria di e auto en cuestion mas o menos 300 meter leu for di e sitio di impacto. Departamento di trafico ta hasiendo e investigacionnan necesario pa establece cu seguridad cua ta e motibo exacto di e accidente fatal aki.