Tjin-Asjoe na ATCA: 2014 monumental pa Aruba den turismo

ORANJESTAD – CEO di ATA, Ronella Tjin Asjoe-Croes a splica na apertura di ATCA 2015, cu aña 2014 tabata un aña “monumental” pa Aruba; a alcansa logronan nobo y hopi importante. Tabata diamars anochi ora cu ATA a brinda un caluroso bonbini na participantenan di ATCA 2015 (Annual Tourism Conference Aruba), cu Tjin Asjoe a haci e declaracion ey. ATCA ta un evento anual pa partnernan den benta di Aruba como destinacion pa vakantie pa e mercado di Norte America, esta Merca y Canada.

PRODUCTO

Durante di ATCA Aruba ta presenta tur producto y servicionan di turismo, como tambe tur updates y futuro proyectonan. E conferencia ta consisti di 3 dia di trabao intensivo pa e 60 socionan internacional incluyendo tour operators y representantenan di aerolineanan partner, y socio nan internacional. E 3 dia nan ta consisti di presentacionnan, inspeccionnan na hotelnan, bishita na sitionan di interes turistico y reunionnan entre partnernan local y internacional pa negocia tarifanan y servicionan y papia di negoshi.

ULTIMO DESAROYONAN 

E CEO di ATA, Ronella Tjin Asjoe-Croes a duna un discurso di bonbini na apertura di e conferencia, cu un splicacion di e ultimo desaroyonan tumando luga, como tambe un resumen di e aña cu a pasa. El a gradici e partnernan internacional pa nan participacion, nan dedicacion y compromiso pa cu Aruba. Tjin Asjoe-Croes a splica cu aña 2014 tabata un aña “monumental” pa Aruba; a alcansa logronan nobo y hopi importante. El a resumi e aña historico di 1.07 miyon bishitante di estadia (stayover), e entrada for di turismo cu a alcansa 2.8 biyon florin Arubano (+6.4% compara cu 2013) y e RevPar cu a mustra un aumento di 20.6%. E RevPar a yega e suma di 185 dollar Mericano, cual ta considerablemente mas halto cu e RevPar averahe den Caribe, cu tabata 132 dollar Mericano na 2013. Aruba tambe a haci hopi bon den e area di airlift, unda cu e “load factor” tabata 80% na 2014 y tabatin un aumento di 7% pa loke ta trata capacidad di stoel. Aruba Tourism Authority a subraya cu e resultadonan positivo ta bay man den man cu e renobacion y evolucion constante den turismo di Aruba y ta un resultado naturalmente di e bon relacion cu e pais ta mantene cu tour operators, aerolineanan y partnernan local.

MERCADONAN

A resumi tambe e crecemento den cifranan pa cada mercado, unda cu Norte America ta keda e mercado mas importante pa Aruba y e ciudadnan mas importante ta New York, Boston y Philadelphia. Merca ta representa 57% di e total di bishitantenan yegando nos isla y e mercado Mericano a crece cu 3.7% aña pasa, tanten cu e total di bishitante, for di tur mercado hunto a mustra un crecemento di 9.5%. E total di crecemento di e mercado di Norte America tabata di 3.3%. A menciona tambe e otro mercadonan, esta Sur America (+26.8%) y Europa (+4.1%).

CIFRAS

Pa e prome kwartaal di 2015, ya caba e mercado di Merca a conoce un aumento di cantidad di yegada di 7.3% y e mercado Canades a mustra un crecemento di 8.2% compara cu e mesun periodo na 2014. E mercado mas importante den Norte America ta e estado di New York (22%), cual no a mustra mucho cambio, pero si a nota crecemento den e mercadonan mas chikito manera Texas (68%), Virginia (24.5%), Maryland (23.6%), Illinois (18.6%), North Carolina (16.4%), Florida (13.5%) y Ohio (11.8%). Aruba ta sigui riba bon caminda pa loke ta e RevPar (e entrada pa cada camber disponibel), segun Ronella Tjin Asjoe-Croes a splica. E RevPar den e prome tres lunanan di 2015 a alcansa e suma di 261 dollar Mericano, cu ta representa un crecemento di 11% compara cu e mesun periodo na 2014. E averahe den Caribe tabata di 188 dollar.