Na Corsou, ladronnan ta horta entre 60 a 80 kabrito pa siman

WILLEMSTAD - Na Corsou, ladronnan ta horta entre 60 a 80 kabrito pa siman. Parlamentario pa PNP Elvin Gerard ta preokupá ku e situashon di ladronisia di kabritu i karné riba nos isla. E ta denunsiando e aktonan aki basta tempu kaba i ayera el a reuní ku kriadónan di bestia. Un reunion bon bishitá ku a konta ku asistensia di sigur 40 kriadó di bestia di Banda Bou, Banda Riba i mei mei di Kòrsou. Nan ta hasi denunsia pero tòg nada ta sosodé miéntras e situashon ta birando mas i mas alarmante.

Ta hopi plaka e kriadónan di bestia ta pèrdè. Un kabritu for di ora e nase te ora hañ’é adulto ta kòrda un kriadó sigur 40 pa 50 mil florin. Nan ta kumpra kuminda ku ta karu, tin di nan ta paga na awa so kasi 20 mil florin pa luna. Si mira bon ta 100 florin pa dèk so na LVV i si tin 12 kabritu muhé ta 1200 mester paga pa dèk esakinan. E kriadónan di bestia tin rapòrt di e preis di kuantu un bestia ta kosta for di beibi te ora e bira grandi.

Antes tempu di Continental Milling nan tabata haña supsidio pa kuminda di bestia pero awor no tin esaki mas. I p’esei nan ta hasi petishon pa mira si por yega na un forma ku por kooperá ku nan pa kuminda di bestia.

Mayoria ladronisia di bestia ta sosodé den área di Bándabou. I p’esei sr. Gerard a hasi un petishon pa reuní ku hefe di kuerpo pero tambe ku minister di hustisia, huntu ku e kriadónan pa por yega na un solushon. Polis mester hasi algu sino e ladronisianan nunka lo kaba.

Tambe ta intenshon segun sr. Gerard pa e aserká korte, den e kaso aki wes Carmelia pa papia di kastigu ku ta duna e ladronnan di bestia.

Mester yega na kastigunan mas pisá ora arestá e ladronnan di bestia, esei ta e petishon ku a sali for di e grupo ayera mainta.

Pa motibu di e falta di atenshon pa nan kasonan, tin di e kriadónan asta ke stòp ku kria bestia. Esaki lo tin su konsekuensianan pasobra Kòrsou lo tin di kuminsá importá mas di loke ta hasiendo kaba.

Kaminda ta sinti mas na man di e ladronnan ta Bou Barber, Flip, Westpunt, Grot di Hato/San Pedro.

Aktualmente ta importá mil i piku na karni porko i kabritu ta importá 2 mil i piku pasobra e kriadónan a pèrdè asina tantu bestia ku nan no por produsí sufisiente karni.

E kriadónan di porko tambe ta poko rabia pasobra tin yen di porko na Kòrsou pero tòg ta permití pa importá e karni. NOTA: E texto ta scirbi den Papiamento fonetico di Corsou.