AHATA ta contento cu a gara bendedor di droga, pero elimina locker riba beach tambe!

ORANJESTAD -  E asosacion di hotel na Aruba Aruba Hotel & Tourism Association AHATA, dialuna a informa cu nan ta contento cu polis a gara bendedornan di droga riba e strip na Palm Beach, manera cu Noticiacla a raporta, pero mes momento a mustra cu nan kier pa elimina e lockernan cu tin poni aworaki pa uso di turista. Esaki, pasobra hasta AHATA a confirma awor cu “ta conoci pa basta tempo tambe, cu e lockers riba beach ta usa pa bendedor di droga y AHATA lo prefera pa elimina nan”, e mensahe tabata textualmente den nan comunicado dialuna riba e tema. 

E ACCION

AHATA pues dialuna a mustra den nan comunicado cu nan a tuma nota cu den weekend Polis tabatin accion exitoso pa aresta bendedor di droga na Palm Beach.“AHATA ta aplaudi y gradici Cuerpo Policial pa e logro y ta spera cu tin consecuencia serio pa tur criminal cu ta trese actividad illegal den zona turistico”, e asosacion a cuminsa na bisa. “ Team di seguridad di hotelnan tin relacion positivo cu Cuerpo Policial y ta comparti informacion regularmente cu polis. E dialogo ta efectivo y productivo” e relato ta sigui bisa.

HOPI TEMPO CABA BENDIENDO DROGA

Loke a hala atencion ta cu AHATA ta confirma tambe awor cu ‘sector hotelero tin hopi tempo ta raporta  bendemento di droga riba beach cual ta afecta imagen di Aruba negativamente y ta crea peliger pa nos industria principal y nos comunidad’.  

APOYO

AHATA a sigura cu nan ta apoya esfuerso di Polis y ta spera cu lo mira mas accion den zona turistico y cu Ministerio Publico lo persigui e casonan exitosamente. Y finalmente “ta conoci pa basta tempo tambe, cu e lockers riba beach ta usa pa bendedor di droga y AHATA lo prefera pa elimina nan”, pues e asosacion awor kier pa elimina esaki tambe. Click AKI pa e relato completo di AHATA riba e tema.