Colombiana popular deteni na aeropuerto di Aruba pa supuesto ‘explosivo’ den su curpa

ORANJESTAD – Un Colombiana popular riba internet, Camila Reyes a crea un sensacion digital ora cu e la keda ‘deteni’ na aeropuerto di Aruba pa substancia sospechoso ekivalente na un explosivo den su curpa. Reyes na Colombia ta un sensacion cybernetico y ta crea contenido riba internet y tin un grupo hopi grandi di persona cu ta siguie. Como tal su experencia na aeropuerto di Aruba a haya hopi atencion internacional. Na final, su experencia tabata uno cu a mustra Aruba den luz positivo, y cu e la sali di malo pa su forma ingenuo di biaha cu cosnan no permiti. 

KICO A PASA\

Reyes a comenta cu e la biaha pa Aruba di vacacion y ta ora cu e tabata bolbiendo pa Bogota, cu na aeropuerto di Aruba e la haya su mes den problema. E ta admiti riba un video, cu e la biaha cu articulonan cu no ta permiti, den su handbag, pero asina mes a sigui biaha. Ora cu e la pasa na seguridad, e la cuminsa pita pa cual a hale un banda pa control. Un control mas rigido a pone e machinan riba alerta cora, indicando cu e tin algo cu no ta bon. Mas aleu a sigui haci prueba y a resulta cu lo a detecta un ‘explosivo’ den su curpa. A resulta despues cu e tin quimico den su curpa, di medicina cu e ta tuma cu ta similar na ingredientenan cu ta wordo usa pa explosivo, pa cual e sensor a reacciona mesora y alerta e personal di seguridad. Na final, esaki tabatin un final ‘feliz’, pero mes momento a pone cu a sigui controla Reyes mas aun y a bin detecta tur e articulonan prohibi, manera crema y cuminda cu tabata surpasa e limite legal di transporta abordo den handbag. E episidio aki a sali positivo pa seguridad di aeropuerto, indicando cu nan ta alerta y ta haci nan trabou bon. E asunto ta cu debi na e popularidad di e persona en cuestion, esaki a haya atencion cu normalmente e lo no a haya. No ta prome biaha cu personanan popular riba internet ta bishita Aruba y ta raporta nan experiencia riba nos isla.