Polis a logra gara bendedor di droga riba hotel strip na Palm Beach

ORANJESTAD – Polis porfin a pone man riba algun bendedo di droga riba e strip di hotel na Palm Beach e siman cu a pasa. Noticiacla a ricibi potretnan di un accion cu polis a tene recientemente,  unda cu porfin a pone man riba un di e personanan aki. Cada bez tabata yama polis pa e personanan aki pero asina cu polis yega, nan tabata huy den e gangnan banda di e hotelnan grandi. Pero e biaha aki, cu ayudo di propio turistanan, otro guy a canta. Lo insolito ta cu e individuonan aki, ta usa lockernan destina pa turistanan warda nan pertenencianan ora di ta riba beach, pa stiwa nan mercancia cu nan ta usa pa bende. Y loke ta mas pio ainda, ta cu ta trata di benta tambe cu menornan di edad. 

CASO ANDANDO CABA

Ta un secreto publico cu tin bendemento di droga eybandanan, y tambe riba beach. Problema ta cu cada bez cu polis yega, di leu e  traficantenan ta mira esaki y ta core bay. E ta birando un problema unda cu noticiacla a compronde cu e mundo turistico ta man na cabez y cu tin hopi keho eybanda, pasobra e ta duna Aruba un mal nomber cu bo por haya droga facil cumpra y net den e zona hotelero, unda centenares di turista ta trafica tur dia.