Sistema tropical ta moviendo direccion laman Caribe pa otro siman

MIAMI – Un sistema tropical chikito anota como sistema AL95 cu potencial pa bira algo mas grandi, diabierna atardi a haya mas organisacion segun National Hurricane Center cu 60% chens pa desaroya den un tormenta dentro di e proximo 7 dia. Loke ta haci esaki interesante pa nos, ta e direccion cu e ta tumando, esta moviendo west cu intencion pa cruza e laman Caribe den curso di otro siman si nada no cambia y si e sigui desaroya manera cu cos ta mustra.

KIBRA

Ta casi custumber cu asina cu e sistemanan pasa e grupo di isla Caribense west, y drenta laman Caribe mes, sea e ta subi, kibra of debilita suficiente cu nos islanan no ta haya mucho efecto di dje, cu sigur ta algo positivo, a menos cu e produci yobida ‘normal’ pa alivia poco secura di verano. Pa aworaki e sistema cu tin e conotacion AL95, tin 40% chens pa forma den 2 dia y 60% chens pa forma den 7 dia, cu ta un chens mediano.