Koenders: Ta wanta visa pa colombiano pa Aruba un aña mas

WILLEMSTAD – Entrante 1 di juli di 2015, Corsou y St Maarten ta haya ‘visum vrijstelling’ pa colombianonan. Esaki ta nifica cu colombianonan no mester di visa mas pa drenta e dos islanan aki. Aruba ta sigui otro aña, ora cu e asunto di paisnan di Schengen ta regla. Esey ta nifica cu por lo menos un aña mas, e situacion pa colombianonan cu kier bishita Aruba, ta keda manera cu e ta. Esta cu esnan cu ya caba por drenta Aruba (nan tin visa pa drenta Merca) por sigui bin Aruba y otronan mester pasa e proceso di haya visa normal. Esey a keda dicidi awe durante e reunion anual di partnernan di Reino na Corsou, cu participacion di prome ministernan di Aruba(Mike Eman), Corsou (Ivar Asjes), St Maarten( Marcel Gumbs) y minister hulandes di relacionan exterior (Bert Koenders). 

DIFERENCIA

E diferencia grandi di opinion entre varios instancia, ta dificulta e posibilidad pa Aruba su prome minister por duna un ‘vrijstelling’ tambe. Como tal e ta warda ora cu e asunto di Schengen ta regla, pasobra e ora e consehonan pendiente no ta valido mas.

CORSOU

Corsou tabata warda pa esaki pa basta tempo y den pasado no mucho lew, tabata te hasta rabia riba Aruba pa a ‘wanta’ e asunto, pasobra segun Corsou, Aruba tabata perhudik’e cu su progreso asina. Colombia ta un mercado hopi fertil pa Corsou, pa entre otro negoshi y turismo. Mas aun cu pa Aruba. Como tal ora cu e noticia a drenta, e comentarionan sigur tabata hopi positivo.

ARUBA

Aruba su situacion ta diferente. Y e asunto tabata un ‘batata cayente’ pa basta tempo. Esey ta splica tambe cu e topico aki tabata riba agenda, sin cu por a caba dicidi. NoticiaCla.com a compronde cu informalmente ya tabata conoci cu gobierno di Aruba lo a informa cu a wanta e decision aki (y asina gana tempo ) dor di bisa cu lo institui un otro commission pa duna conseho di Minister un otro conseho  riba e punto aki.

AMBTELIJK ADVIES

E ‘ambtelijk advies’ tabata pa no ‘schaf af’ ,considerando cu ya a percura mientrastanto pa e grupo cu a ‘target’ pa Aruba ta sirbi cu e flexibilisacion di visa, algun tempo atras. A introduci e.o. ‘vrijstelling’ di visa pa Aruba pa esnan cu por ehempel tin visa Mericano, schengen etc . Pues e grupo ey ya no mester di visa pa por bin Aruba.

RED CARPET

Plus a introduci un sorto di red carpet/ yama "Caribbean Carpet" na embahadanan cu ta duna e frequent flyer y businessman etc (e grupo cu Aruba ta mira como target) un trato preferencial y ta duna nan por ehempel visa pa bin Aruba cu ta 4 aña cu multiple entry valido. E visa pa Colombiano tecnicamente ta vigente actualmente pa pre-screen esunnan cu ta bin pa bishita famia y amigo etc (= grupo di risico). Foto cortesia Jeu Olimpio/Antiliaans Dagblad. Colaboracion: Dick Drayer.