Parlamento di Aruba kier claridad di gobierno riba CFT

ORANJESTAD – Parlamento di Aruba kier claridad di gobierno (di Aruba) riba College Financieel Toezicht. Mas sigur, si gobierno tin pensa di aplica e consehonan di CFT den e presupuesto pa 2015. Den un carta di presidente di parlamento Marisol Lopez Tromp e siman aki, e  ta duna gobierno te cu fin di siman aki pa avisa kico nan intencion ta cu e consehonan di CFT. Y  parlamento kier sa “den cuadro di e acuerdo (protocol) recien firma”.

PUNTO DI BISTA

Parlamento ta sali for di e punto di bista, segun e carta, cu a cuminsa cu tratamento di presupuesto 2015, y e reaccion recien di CFT di 10 di april ultimo, cu ta nota cu ainda gobierno no a aplica e cambionan cu nan a sugeri segun e fecha 29 di december 2014, y e ultimo protocol firma diasabra ultimo (2 di mei 2015). Tur ta cosnan cu por hunga un rol den e presupuesto y como tal parlamento mester di claridad urgente.

PROMESA

Ademas , segun parlamento gobierno a haci e promesa den e ‘nader rapport’, pa ofrece Raad van Advies e posibel ahustacionnan.

URGI

Como tal, Lopez na nomber di parlamento, ‘ta urgi gobierno pa mas pronto cu ta posibel, y en todo caso e siman aki ainda, pa notifica cu si relaciona cu e ultimo acuerdo aki, tin intencion di aplica ahuste nan substancial segun un nota di cambio, y participa esaki na parlamento’. Lesa e carta aki