Presunto capo di droga grandi busca pa Hulanda, gara na Colombia

TULUA – Un presunto capo di droga Colombiano cu ta wordo busca na Hulanda, a keda deteni den e ciudad Colombiano Tulua. Esey e organisacion policial Europeo Europol ta raporta awe. Ta trata di un homber di 43 aña cu ta wordo sospecha di a trafica 2.5 tonelada di  metanfetamina di cristal na 2019. E lo a coordina e produccion di e droga aki pa cartelnan di Mexico na Hulanda. Tambe e lo ta envolvi cu varios laboratorio di droga na Hulanda y e traficacion di un cantidad di cocaine. Y finalmente, e ta wordo acusa di labamento di casi 20 miyon euro. E detencion ta danki na un investigacion lidera pa Hulanda, cu sosten di Spaña, Merca, Colombia y Europol.