Corte: Bartender di restaurant popular ta perde trabou pa a bebe alcohol na trabou

ORANJESTAD – Bebemente di un solo bebida durante trabou a costa un bartender Hulandes na Aruba su trabou. E homber a perde su trabou y mester a paga un daño y perhuicio na e compania cu un luna di salario. Corte a dicta esaki diamars den corte na Aruba. E homber ta trata desde 2021 como bartender pa e compania cu ta maneha e restaurantnan na Palm Beach, esta Lucca y Brutto . E homber tabata gana un salario mensual di 2500 florin bruto. Debi cu e ta un residente original di Hulanda, e noticia aki a hala atencion di prensa Hulandes, entre nan RTL Nieuws.

SUSPENDI

Tabata na December di 2021 cu e homber a keda suspendi y despues despidi pasobra e lo a viola e regla di e restaurant Lucca door di a bebe un bebida alcoholico. Imagen di video ta mustra con e tabata basha whisky den un cup di carton tras di bar, drecha algun cos y despues sali pafo cu e cup. E compania a bay corte pa termina e contract di trabou cu e bartender, argumentando cu bebe durante ora di trabou, no ta permiti. E homber a exigi pa haya su trabou bek pasobra e ta considera e castigo mucho pisa. E la desmenti cu e lo a horta un cup cu whisky, y cu e bebida a wordo ofreci na dje door di un cliente. 

SENTENCIASinembargo via un sentencia a resulta cu corte a duna e restaurant razon., Bebe durante ora di trabou ta prohibi y como tal e retiro ta hustifica. De echo, corte no a kere e cuenta cu e bartender a haya e bebida di un cliente. Riba e registro di e caha, no por a demonstra cu durante e periodo ey, a bende un glas di whisky.

REACCION

Durante e investigacion pa e caso, e bartender a sigura cu normalmente nunca e ta bebe durante trabou y cu casi semper e ta rechasa oferta di bebida di cliente. Solamente cu permiso di su manager, e lo a haci un excepcion, manera ora cu e cliente tabatin algo special pa celebra. Cu e declaracion aki, sinembargo e bartender a pega su mesun barco. E huez a mira como prueba, cu e bartender tabata sa bon bon kico e reglanan tabata di e restaurant, cu ta prohibi alcohol durante trabou. E bartender no solamente a perde su trabou, pero mester a cubri gasto di corte di e doño di trabou, cu tabata mas di 3 mil florin pues casi doble su salario.