Dowers: Caso contra cuidadonan di prison no ta crea precedente

ORANJESTAD – E caso penal actual den corte contra 8 cuidado di preso, no mester crea un precedente pa e forma con lo anda cu cuidadonan di preso den futuro. Minister encarga cu husticia, Arthur Dowers a sigura NoticiaCla.com cu e caso aki no   bay cambia e forma con ta actua pa coregi un situacion robes. Mester mira e caso riba su mes. “Tin ley y regla cu ta stipula con pa actua momento cu un prizonero actua contra cualkier regla di instruccion”. Cu e cuidadonan di preso por sinti nan menasa, e mandatario no por comenta, pasobra e no por papia riba sentimento di hende, den e caso aki, di e sentimentonan di e cuidadonan di preso.

REGLA

E caso actual ta uno unda cu un preso a keha cuidadonan di preso, pasobra e la sinti cu e forma con a actua contra dje, no ta e forma cu bo por actua cu bo ora cu bo actua fo’i sla. “Ora cu un persona haci algo contra un gedetineerde, of cu un gedetineerde dal un trahado, e trahado (of prizonero) por haci aangifte contra e persona y (e persona) por wordo persigui” Dowers a sigui bisa. Y den e caso aki, ta e preso a haci un denuncia, pa cual e cuidadonan ta wordo persigui. Y basa riba e caso, ta un huez imparcial lo determina kico e resultado lo ta den e caso y ken a actua corecto. “Basa riba esey tin cu tuma caso paso pa loke ta futuro”. Den mesun rosea, Dowers a sigura cu realidad di bida ta cu pa tur accion cu tin den prison, tin un sancion cu ta bin den su contra, y esey tin cu wordo aplica conforme loke ta para riba papel (ley).

MENASA

Problema sinembargo ta, cu e cuidadonan di preso y nan famianan ta sinti cu nan ta cu lomba contra muraya, pasobra e resultado di e caso aki por determina e futuro actuacion di prizoneronan. Nan ta pensa cu si e prizonero gana e caso, mas prizonero lo uza esaki como un forma pa saca probecho, y cu finalmente e cuidadonan di preso, lo por sali perhudica.

E CASO

Tabata dos siman cu e caso menciona a sigui den corte, despues cu 3 siman e caso a keda posponi pa por haci mas investigacion y interogacion, e caso contra 8 cuidado di preso di KIA pa maltrato di preso, a continua . Ta trata di personanan cu ta wordo acusa di, como ambtenaar den funcion na KIA, a tortura un preso. E caso riba su mes ta uno unico, mirando cu no ta usual cu un grupo asina grandi di persona hunto ta wordo acusa pa un ‘delito’ asina.

CARGONAN

E cargonan specifico segun Angela den e caso aki ta cu nan ta wordo culpa di a tortura un persona y/of a intencionalmente permiti pa un of mas otro tortura e persona aki, dor di a intencionalmente causa dolor fisico y/of mental grave y/of sufrimento na e persona, cu tabata deteni y/of den poder di e sospechosonan. Esaki dor cu a (mientras e persona tabata ge boei cu su mannan tras di lomba) a scop y/of dal e cu mokete y/of a dal e varios biaha na su cabez y/of curpa, a consecuencia di cual e persona a sufri lesionnan grave (entre otro, cashi di wowo kibra y kaak kibra) y/of dolor y sufrimento fisico y mental grave, y despues a lage algun ora parcialmente sunu cera su so sin a percura pa e haya cuido medico, a consecuencia di cual e persona a haya dolor fisico y mental grave y/of a sufri gravemente, y/of cu a intencionalmente keda sin actua mientras cu otronan a comete e tortura aki riba describi, cu e fin di haya un confesion di e persona y/of straf e pa algo cu el a haci of a wordo sospecha di a haci y/of pa spanta otro hende. Cu excepcion di e persona M.A.C, tur ta hendenan masculino. E inicial di esnan sospecha pa e caso aki pues ta M.W.l.G. D.N.J.L.,I.H.G.M., C.R.J., G.P.M., A.R.D., M.A.C., R.J.d.l.C..