Women’s Club of Aruba a honra e miho graduadonan

ORANJESTAD - Women’s Club of Aruba (WCA) ta honra e miho graduadonan di tur tipo di scol secundario pa hopi aña caba durante luna di juli.

E aña aki, riba diamars dia 11 di juli, e ceremonia a tuma luga na Surfside Marina, cu presencia di su Excelencia Gobernador Alfonso Boekhoudt, acompaña di su esposa Hanneke Boekhoudt, kende ta miembro honorario di WCA, nos minister di Educacion y Deporte Sr. Endy Croes y Sr. Ilan Lopez, Marketing & Public Relations Officer di Caribbean Mercantile Bank, banco cu ta e sponsor principal di e evento.

E miho graduadonan a ser invita pa un anochi special, pa ricibi un reconocemento como e miho graduadonan di tur e scolnan den nan tipo di scol. Presidente di WCA, Sra. Reina Geerman, hunto cu Sra. Hanneke Boekhoudt y Sr. Ilan Lopez, a haci entrega di plakaat, e “Shoco Award” y otro premionan na e miho graduadonan di pais Aruba.

E aña aki, tur representante di e scolnan cu e miho graduado, tambe a ricibi un reconocemento di parti di WCA.

Aki ta sigui nomber di esnan cu a ricibi honor.

Pa VWO ta Ryvic Simon (Colegio Arubano) y pa HAVO tin un empate entre Naysa Rojas (Colegio Arubano) y Maxima Candelaria (Schakel College).

Pa Colegio EPI tin 5 graduado, pa Unit Ciencia y Tecnologia (Bouwkunde): Jeandrick Wolff, Unit Economia (Financiële Administratie): Cassandra Donato, Unit Salubridad y Servicio: Bryan Haayen, Unit Hospitalidad y Turismo (AS): Ceaslyn Richardson y (AAS): Jofré Ridderstaat. 

Pa Ibero American High School: Jean Clarie Rob, EduCampus: Hulda Lovius, DPOO (Scol pa Polis): Alvin Maduro y pa International School of Aruba: Alessia Reale Chiappini.

Pa MAVO 7 vak ta Frederick Lobbrecht y pa 6 vak Kiana Paesch, ambos ta di Juliana School.

EPB: Niveau Doorstroom tin dos miho graduado, Alysha Hardeveld y Darimar de los Angeles Hernández Zambrano. Pa Niveau Uitstroom ta Gervinio Henriquez y pa Niveau Arbeidsmarkt tin un empate entre Alizienne Thielman y Johnns Paredes Egues.

E miho graduado pa SPO ta Victor Gedler Maldonado (Ubicacion Sta. Cruz).

Pa Avond HAVO ta Gavriëla Bozo Tinaure y pa Avond MAVO ta Lisanne Koolman (7 vak) y Milca Alberto (6 vak). 

Un invitado special p’e anochi aki tabata Sra. Merveline Geerman, artesano y doño di Indira Skincare, miho graduado na aña1980 di Huishoudschool, kende a dirigi su mes na e miho graduadonan y a duna testimonio di su experiencia y perserverancia pa a yega caminda e ta awendia, a pesar di a encontra hopi obstaculo den su bida.Fotonan pa cortesia di Emperatriz Perdomo