Visa colombiano riba agenda di ‘Consulta di Reino’ na Corsou

ORANJESTAD – E asunto di visa pa colombianonan drenta e.o. Aruba, lo ta riba agenda awe durante un Consulta di Reino na Corsou. “E ta riba agenda pa wordo trata”, minister hulandes Bert Koenders a bisa NoticiaCla.com dialuna atardi. No tin decision tuma ariba e asunto ainda, pero e tin atencion. “E no ta un topico controversial. Ta algo cu nos lo papia ariba” Koenders a sigui bisa. Koenders a reemplaza Frans Timmermans recientemente como minister di relacionan exterior y tabata na Aruba pa 24 ora, como parti di un gira den Caribe. Despues di su bishita pa Aruba, e la biaha pa Corsou dialuna anochi hunto cu premier Mike Eman pa atende e consulta di Reino.

RELACION VENEZUELA

E mandatario a papia tambe riba e relacion cu Venezuela y su impacto pa cu nos islanan. “Nos ta vigilando e situacion na Venezuela hopi di serca” e mandatario a bisa. E motibo di e interes ta relaciona cu e seguridad pa e habitantenan di e parti caribense di Reino Hulandes. Segun Koenders, ta sigui inverti den e relacionnan cu Venezuela y ta considera e relacionnan cu e pais bisiña como bon. “Ser bon bisiña ta e base di e relacion entre Reino (Hulandes) y Venezuela” Koenders a sigui bisa. Despues di Aruba y Corsou, e mandatario ta biaha pa Cuba, Guatemala y Mexico.