Hawin Ruiz a bira e di 6 morto di trafico na Aruba pa 2023

ORANJESTAD – E cuidadano Hawin Ruiz (31) a bira e di 6 morto di trafico di Aruba pa 2023. Asina vocero di polis Liliana Rasmijn a confirma diadomingo mainta. Ta trata di un victima di trafico cu a accidenta diabierna anochi laat, y cu debi na su heridanan, a fayece diasabra anochi laat. 

E ACCIDENTE

Tabata pa 10:56pm di diabierna anochi cu central di polis a wordo notifica di un accidente entre dos auto na altura di Boolchand’s den Havenstraat na Oranjestad. Na yegada di patruya a topa cu e chauffeur di e Suzuki color shinishi gravemente herida. Ambulance a wordo pidi cu maximo urgencia y na nan yegada e personal di ambulance a stabilisa e victima y transporte cu maximo urgencia pa Dr. Horacio Oduber Hospitaal. Na e sitio di e sucedido a presenta specialistanan di trafico, polis tecnico, fiscal y departamento di slachtofferhulp. 

VICTIMA A MURI DIASABRA ANOCHI

Diasabra despues di 11’or di anochi, polis ta wordo informa cu e chauffeur involucra di accidente a fayece na Hospitaal. Dokter a constata morto di e homber yama Hawin Harold J. Ruiz, naci na Aruba, dia 26 januari 1992. E ta e di seis morto den trafico pa aña 2023. Cuerpo Policial ta informa cu e caso ta bao investigacion y e curpa a wordo confisca riba ordo di fiscal. Alabes tin un persona deteni den e caso aki. Noticiacla y Cuerpo Policial Aruba ta manda palabra di profundo condolencia na famia di e fayecido.