Van Huffelen riba BBO na frontera: Satisfecho, basta Aruba genera mas entrada na impuesto

ORANJESTAD – Gabinete Rutte 4 no tin problema si Aruba ta usando BTW of BBO como e modo pa genera mas entrada na impuesto. “Nos ta simplemente haye importante pa dos cos sosode. Cu tin un bon sistema di impuesto, y cu tambe e entrada na impuesto aumenta” van Huffelen a cuminsa na bisa. “Y esaki (BBO na frontera) ta un manera den cual esaki por sosode, pues cu esey mi ta contento” van Huffelen a bisa finalmente. Pues e mandatario no tin problema si ta BBO of BTW, basta cu tin algo cu Aruba tin pa genera mas entrada na impuesto. 

A PRIMINTI HULANDA CU LO TIN BTW

Na inicio, Aruba a priminti Hulanda cu parti di e reforma ta cu Aruba lo introduci e BTW como forma pa genera mas entrada di impuesto. Pero despues a pospone esaki na fin di aña pasa, y a anuncia cu lo aumenta BBO cu 1%, y despues lo introduci BBO na frontera. Pues, cu contrario na e hecho cu a priminti BTW, a opta pa na caminda cambia esaki. Pesey e pregunta a bin si Hulanda tin problema, cu Aruba a opta pa cambia BTW pa BBO na frontera. Y e contesta ta no, no tin problema cu esey, basta e genera placa na impuesto y cu si e sistema di impuesto ta bon hinca den otro. “Y Aruba a bisa cu esaki ta e caso”, e mandatario a bisa Noticiacla. 

REACCION NA ARUBA

Siman pasa ainda e mandatario no kier a duna un reaccion riba e pregunta, mirando cu Parlamento e dia ey no a vota pa e ley di BBO na frontera drenta na vigor. Pero mientrastanto esey a sosode, Parlamento a aproba e ley, y awor si e mandatario Hulandes a duna su comentario riba e asunto aki.