Joran vd Sloot a ‘ahusta’ bon na su bida ‘nobo’ den prizon na Merca

SHELBY – E sospechoso di desaparicion di Natalee Holloway na Aruba na 2005, Joran van der Sloot ta aclimatisando den prizon na Merca. Segun fuentenan den e prizon, Van Der Sloot tin un ‘miho bida’ den e prizon na Merca compara cu na Peru. E lo a ahusta hopi lihe na e bida eyden, den e Prizon di Condado di Shelby na Alabama. “Ta manera cu e tin añanan aki caba” un guardia di e prizon a bisa e portal The Messenger. 

CASO NA OCTOBER

Segun documentonan di Corte, vd Sloot lo presenta den corte ten a October proximo. Te e tempo ey, e lo permanece den e prizon na Alabama. Contrario na e prizon na Peru, no ta rekeri pa prizoneronan na e prizon na Shelby, permanece den nan cel pa 23 ora pa dia. Nan por congrega den un camber di recreacion of otro area durante curso di dia. Ta anochi so nan ta bolbe den nan cel. EXTRADICION

Luna pasa vd Sloot a keda extradita pa Merca for di Peru, pa presenta pa e caso di extorcion contra dje. Pa esaki e mester presenta y keda por lo menos 2 aña y despues bolbe Peru pa caba sinta su castigo di prizon eynan di 28 aña pa asesinato di un dama Peruana na 2010. E caso na Merca tin un otro sentencia colgando riba cabez di vd Sloot si haye culpable.