Minister Bermudez: Protocol firma no ta mina autoridad di parlamento

ORANJESTAD - E protocol firma recientemente no por mina e autoridad di nos parlamento. Esaki ta pensamento di minister di finanza Angel Bermudez, como prome reaccion riba e protocol den un comunicado for di su oficina. Segun Bermudes, al contrario, parlamento por ta mas confortabel cu e idea cu cada presupuesto cu wordo discuti, tin un base financiero solido certifica pa Aruba Financieel Toezicht (Aft), mientras cu e debatenan por concentra riba e contenido di e maneho di gobierno. Mes momento e mandatario ta relata riba e beneficio di e protocol pa cu finanza di Aruba.

AFT NECESARIO

E mandatario, -un critico di CFT den e forma cu e kier impone na Aruba-, ta sigui mustra den e comunicado, cu e acuerdo cu Hulanda tocante AFT ta un reforma necesario. “Nos mester cuminsa compronde cu Aruba no por keda den e infrastructura anticua di casi 30 aña pasa”. Bermudez ta considera e reforma aki di mes un importancia cu esun di pensioen, di AOV y tambe esun di impuesto cual lo tuma luga otro aña, pa asina Aruba por yega na un finanzas publico moderno y sostenibel. Den cuadro di e protocol aki Minister Bermudez ta haci enfasis riba e henter e desaroyo di Aruba su finanzas publico unda cu e no ta trata unicamente di con e presupuesto ta wordo concipia, pero tambe con e ta wordo ehecuta, cu segun e dignatario ta e parti mas cardinal.

APROBA PRESUPUESTO

Bermudez no a nenga nunca cu e no ta contra supervision financiero, sino solamente e forma con specificamente CFT kier a haci esaki y e autoridad total cu e tabati. Segun e comunicado, awendia mundo financiero no ta acepta cu despues cu un presupuesto wordo aproba, e ta bay den cashi di olvido, pa es motibo tambe mester duna cuenta regularmente, y pa esaki mester tin un structura cu ta administra y genera tur e aspectonan di e presupuesto. Di e manera aki por vigila si e maneho ta riba e trayecto stipula, y si mester adapta e maneho.

MONITOR

“Nos mester por monitor pa nos por visualisa y tambe pa por coregi a base di cifranan constante cu ta duna di compronde con e ehecucion di e presupuesto ta bayendo dentro e cuadro aproba! Sin esey bo no por domina y bo no por maneha bo finanzas publico”, e mandatario di finanzas a sigui splica. “Rond mundo bo ta weita cu e vigilancia aki ta wordo eherce pa un instituto independiente yama Fiscal Counsel, Begrotingskamer, Aft of loke sea.”

ASISTENCIA DI HULANDA

E puntonan cardinal di e protocol ta cu Hulanda lo asisti den e fase inicial pa e ‘Begrotingskamer’ por medio di asistencia temporal di Cft su experticio. Asina cu e instituto aki ta para riba su mes pia – pa mas tarda 2018 ora cu tin un presupuesto balansa - e ta bira un asunto totalmente Arubano, asina Minister Bermudez a sigura. Ademas, e asistencia aki ta un parti di e esfuerso total pa mehora e funcion financiero di e aparato gubernamental. P’esey Hulanda tambe lo asisti pronto cu experticio tecnico riba tereno di impuesto, aduana y financiero, durante un par di aña, pa mehora e organisacion di belastingdienst, douane, directie financiën y demas departamentonan cu conhunto ta forma e funcion financiero di pais Aruba.