Comerciante ta sigui deteni aunke cargonan segun abogado no ta mucho cla kico nan ta

ORANJESTAD – Un dia despues cu propietario di e compania Fast Delivery, esta e comerciante R. Helder a keda deteni, ainda no ta mucho cla kico e cargonan exacto ta. Den combersacion cu su abogado, e la confirma cu Helder ta deteni ainda, acusa di labamento di placa. Pero den cuadro di kico exacto, no ta conoci pa e abogado ainda. A compronde cu diabierna e lo tin cu presenta dilanti huez comisario pa determina e proceso di su detencion y si esaki ta keda prolonga. Mientrastanto Ministerio Publico diahuebs a djis confirma tambe pa e portal aki, cu sr Helder ta deteni riba cargo di labamento di placa. Mas cu esey, no por a bisa sino cu solamente e investigacion lo mester duna mas claridad riba esaki. 

DETENCION 

Manera ta conoci, diaranson durante mainta y merdia, autoridad a tene dos entrada hudicial relaciona cu e caso cu a haya e nomber Magenta, unda cu a drenta na cas di e propietario y na su negoshi. Na un di e dos lugarnan aki a pasa pa detene y hib’e cera, unda cu ta acuse di e cargo menciona. Durante e accion aki, a cera e lugar y laga e trahadonan bay cas pa asina por a sigui cu e trabou di autoridad policial. NOTA: Potret cortesia di Bondia Aruba.