A recorda 70 aña cu a libera Hulanda di invasornan den segunda guera mundial

ORANJESTAD - E aña aki ta haci 70 aña cu Hulanda a ser libera di e invasornan durante e segunda guera mundial. Aruba tambe a yuda hopi durante e guera aki den abastece e aliadonan cu combustibel. Ta p’esey Camarada-Aruba a duna mas atencion na e ceremonia aki. E aña aki atrobe a conmemora e fayecidonan durante e segunda guera mundial. Tambe a conmemora esunnan cu a fayece den servicio di Reino Hulandes durante conflictonan militar (Indonesia) y durante operacionnan di pas (Libanon, Bosnia y Afghanistan). Sucesonan manera, atake di submarino riba tankernan y LAGO, torpedo riba beach na Eagle, ta algo cu nos por a mira y lesa di dje. Pero ta poco ta esunnan cu a para keto un rato y puntra nan mes, kende ta nos hendenan cu a muri y disparce durante e guera cruel aki. Tur misa a ser pidi pa bati e kloknan di misa desde 5:45 pm te 5:59 pm. Tambe a pidi stacionnan di radio y di television pa tene 2 minuut di silencio cuminsando 6’or di atardi. .