Den prome luna di 2023 Corsou a mira un bahada drastico di turista Hulandes

WILLEMSTAD - Organisashon pa turismo i hospitalidat na Kòrsou, CHATA, a duna di konosé ku e kantidat di turistanan hulandes ku a bishitá Kòrsou den e promé sinku luna den 2023 a baha ku 21 porshento kompará ku e promé sinku luna den 2022. Aña pasá entre promé dia di yanüari i último dia di mei 107.754 turista hulandes a bishitá nos isla, e aña aki e kantidat ta 85.105 turista for di Hulanda den e mesun periodo.

CHATA den nan último ‘newsletter’ ta splika ku e kantidat di turista hulandes ku a bishita Aruba den e promé sinku luna tambe a baha; ku 22 porshento. Kantidat di turista hulandes ku a bishitá Repúblika Dominica den e mesun periodo a baha ku 15 porshento. México a mira un bahada di 9 porshento di turistanan hulandes den e promé kuater luna di e aña aki.

CHATA ta splika ku no ta asina ku hulandesnan a stòp di biaha. Kantidat di turista hulandes ku a bishita Gresia den e promé tres luna di e e aña aki a dobla. Den e mesun periodo e kantidat di hulandes ku a bishita Spaña a krese ku mas ku 3 porshento te 1,371 mion. Ku ta nifiká ku mas turistanan hulandes ta preferá pa keda mas serka ku nan kas i no bai hopi leu. Ku ta nifiká ku nan ta keda den Oropa i no bai Karibe.

Tin un destinashon so den nos region ku a registrá mas turista hulandes e aña aki. E kantidat di turista hulandes ku a bishita Costa Rica den e promé sinku luna di e aña aki a krese ku mas ku 25 porshento, asina CHATA ta duna di konosé. NOTA: Texto ta scirbi den Papiamento fonetico di Corsou.