Na Hulanda a paga asesino di e yu di Kòrsou Shantienne Frans 10 mil euro pa likid’e

ROTTERDAM.-  Ayera korte di promé instansia na Rotterdam a kondená e dos hòmbernan Reinaldo C. (22) i Cleiton A.(21) na 18 aña di prizòn kada unu pa asesinato di e yu’i Kòrsou Shantienne Frans (31).

Esaki tabata 4 aña ménos di loke fiskal a pidi. Frans a keda likidá riba Nassauhaven na Rotterdam-Feijenoord den Rotterdam-Zuid. Korte ayera a duna di konosé ku e likidashon a keda ehekutá riba órden  di un tersero pa 10 mil euro. Reinaldo C. a atmití ku e ta esun ku a tira Shantienne mata. Segun korte, e dos akusadonan prepará e likidashon for di un dia anterior. Despues di a likidá Shantienne, nan a kima e BMW hòrtá ku nan tabata move aden.

Pero durante investigashon polisnan a haña un hanskun banda di e vehíkulo kimá ku DNA di esun ku a likidá e víktima ku ta Cleiton. Tambe nan a haña vários huls ku su DNA riba dje.  Un persona ku tabata den su balkon e anochi ei i a presensiá e suseso, a filma loke a pasa. Polis a tuma nota di e pañanan ku e akusadonan tabatin bisti i tambe na momento ku e akusado a yega den bisindario di e kas riba un skuter ku e mesun karson strepiá.

Shantienne a keda likidá dia 23 di mei aña 2022 na Rotterdam. Su ruman hòmber Merwin “Junny” Frans (30) tambe a keda asesiná  den luna di mei na 2020. Shantienne tabata un hende ku tabata kore motersaikel.  Un dia despues ku el a keda asesiná, un gran kantidat di amigunan ku e ta kore motersaikel kuné, famia i konosínan, a bai na e sitio unda el a fayesé i asina a rekord’é. Hendenan a pone flor i peluche, miéntras amigunan a “race” nan motersaikel nan, lagando bastante huma atras. E kaso di asesinato hopi kruel aki a tuma lugá den kareda di mitar di diesdos (ora di Ulanda). Den e oranan ei den Persoonsstraat den bario di Feijenoord bala a zona. Aki Shantienne a haña bala, pero a kuminsá kore pa skapa su bida, sinembargo e no a yega leu ku den Nassauhaven el a sak den otro.

Aki tambe e malechor a sigui basha 4 bala mas riba dje Segun informashonnan ta indiká, un ratu promé Shantienne lo mester tabatin diskushon ku un grupo, kaminda e agresor tambe tabata forma parti di esaki. E víktima a kore pa su bida, pero e malechornan ku tabata den outo a siguié i den Persoonstraat a kuminsá tira riba dje, despues e konsekuensia fatal. Algun kaya despues a kima e vehíkulo shinishi den kual e agresor a hui bai for di e sitio. NOTA: E texto ta scirbi den Papiamento fonetico di Corsou.