ANALISIS: CAFT ta un CFT ’Light’

ORANJESTAD – E protocol firma diasabra ultimo entre Aruba y Hulanda, ta un documento di 6 pagina cu instruccion pa Aruba con pa maneha su mes corectamente pa logra salvaguardia su metanan financiero. Mientras cu e protocol ta papia di acuerdo entre e dos paisnan, gran parti ta relata na palabracionnan cu Aruba tin cu cumpli cune, incluyendo palabracionnan haci den pasado, cu no a cumpli cune. Entre nan e palabracion di 12 di december 2014, y medidanan sugeri pa e College Financieel Toezicht, fecha di 29 di december 2014. De hecho, cu excepcion di e nomber, e no ta varia mucho di e concepto di e CFT original, los di cu e no ta ‘permanente’ y cu e ta un ‘paso intermedio’ prome cu yega na e begrotingskamer na 2018. E diferencia, ta cu Aruba tabatin ‘inspraak’, aunke cu e ta keda cu Hulanda su supervision.

DESICIONAN

E protocol ta ensera un total di 12 decisionnan tuma, y 12 palabracion adicional di cual mayoria ta conta pa Aruba cumpli cune. Loke ta hala atencion, ta entre otro punto number 3, cu ta referi na e CFT y su medidanan, cu ta mustra cu no obstante e hecho cu Aruba ta haya su CAFT, e mester ainda ‘traduci e consehonan di CFT di 29 di december 2014, den medidanan concreto y bon motiva, cu por wordo implementa na tempo e aña aki ainda. CAFT lo sigui eventualmente cu mas conseho riba esaki. Ademas punto 3 ta bay mas leew bisando cu ‘pa loke ta e medidanan no valido directamente pa e presupuesto 2015, tin cu haya forma den e proximo CAFT’.

CONTENIDO

Loke ta hala atencion tambe ta cu Aruba (hunto cu Hulanda) ta completamente di acuerdo cu e contenido y e forma huridico di e protocol. Y cualkier ley cu mester wordo adapta pa por yuda ‘construi CAFT’, lo simplemente mester wordo tuma.

METEMENTO HULANDA

Segun e protocol, Hulanda tin e derecho (segun punto 10) pa, si Aruba no cumpli cu e contenido di e protocol, na tempo, of ta desvia di e contenido, gobierno di Reino por cay aden pa medio di e instrumentonan na su alcanse.

CONTROL

E protocol ta forza Aruba tambe pa check prome cu Hulanda, prome cu e por adapta of cambia e contenido of parti di e contenido di e protocol. Sin check cu Hulanda, esaki no por sosode. Esey ta cuestiona e autonomia di Aruba si enberdad esaki ta kita of no.

RMR

Mescos cu ta e caso di CFT, segun e protocol, CAFT ta raporta directamente na Conseho di Minister di Reino riba e progreso. Y unabes mira cu e ta cumpliendo, lo pasa pa e begrotingskamer anuncia. (Mira e protocol completo aki)