EMAN: Acuerdo sera ta e miho forma pa salvaguardia autonomia

ORANJESTAD – E protocol firma den fin di siman aki, tabata e miho forma pa salvaguardia nos autonomia for di Hulanda. Esaki tabata e argumento di prome minister Mike Eman awe mainta, ora cu e la presenta e protocol firma den fin di siman. Segun Eman, si no ta pa e acuerdo aki, Hulanda lo a interveni sin mas cu un algemene maatregel van rijksbestuur y asina impone CFT manera cu tin na Corsou. Segun Eman, Aruba awor tin un organo temporal pa guia e situacion financiero, te ora cu Aruba haya su propio begrotings kamer. Preta pa tempo, e mandatario no por a bay den mucho detayes. E la repasa e contenido, y aki aya duna su toke personal di logro, y a priminti pa bolbe riba esaki durante e tratamento di presupuesto. Esaki no a kita afo cu varios pregunta a wordo haci na gobierno, pa por a haya mas claridad, y mayoria di nan a haya contesta di e premier tambe.

ANDIN BIKKER

Entre nan, a bin e pregunta di Andin Bikker (DR) ki impacto e consehonan haci pa e CFT tin actual riba e presupuesto 2015. Tambe a cuestiona e parti cu si desvia di e texto di e protocol, cu Aruba por haya un AMvRB toch. Bikker ta cuestiona cu gobierno ta yama e acuerdo aki como un logro, siendo cu grandemente gobierno di Reino ta esun encarga cu control y ehecucion di esaki. E kier haya splicacion con exacto e poder di Aruba ta keda, compara cu Hulanda. “Segun mi, e ta sino fono” Bikker a sigui bisa.

EVELYN WEVER CROES

Pa loke ta lider di fraccion di MEP, Evelyn Wever Croes, e la yama e dia di awe como uno scur, debi cu ta considera cu gobierno a entrega autonomia di nos pais. Ademas a critica e cantidad di minuut cu a haya pa haci pregunta y analisa (2 minuut) protocol ricibi. Wever Croes a puntra e.o. kico awora ta diferente cu 9 luna pasa, pa awor si, Eman a acepta CFT siendo cu aña pasa a bisa ‘over my dead body’. Tambe a puntra, e.o. basa riba articulo 3, (CFT su consehonan) si awor si gobierno di Aruba lo implementa (ademas di e 24 puntonan di gobierno) e otro medidanan menciona.

RENE HERDE

Lider di fraccion di AVP Rene Herde a uni su mes na mayoria di oradonan cu a bay prome cune (Bikker y Wever Croes) ora cu e mester a haci pregunta. Pero tabatin algun punto cu e lider di fraccion kier a haya claridad. A pidi pa clarificacion pa sa na ki momento e supervision temporal ta termina. Tabata kier sa si tin un fecha specifico pa esaki tuma lugar. Tambe a critica e normanan di CFT basa riba esun na Corsou. Y como tal kier sa kico e normanan ta cu ta wordo uza den e CFT di Aruba. Ademas a pidi pa clarifica e rol di parlamento. Bou di ki espacio parlamento lo funciona den e añanan benidero y con lo sigui salvaguardia nos economia.

TENSION ENTRE PARLAMENTARIONAN

Fuera di e varios lidernan di fraccion, a duna oportunidad na varios parlamentario pa haci pregunta. Durante e intercambio aki, tabata visibel, cu tabatin discordia entre e parlamentarionan, unda cu varios a resorta na gritamento na otro, cu na varios momento a bira un ‘free for all’. Palabranan menos nechi di ambos banda a cay, pero tabata notable cu miembronan di fraccion di MEP tabata visiblemente mas disgusta y tabatin dificultad na varios momento pa domina nan mes. Presidente di parlamento tabata hopi tolerante, cu no a cai na agrado di e fraccion di MEP. Fraccion di AVP no a perde pa gana y tabata contesta manera cu nan tabata sinti ta bon. (lesa e protocol completo aki)